Kơxo hâi lơ 9/10, kô po Hneăng  hôp mâu kăn Đảng ƀô̆ kong pơlê Lâm Đồng rôh má 1, hneăng 2025-2030. A Đà Lạt, tíu po hneăng hôp a mâu tíu xiâm mâu kong pơlê Dak Nông, Bình Thuận ton nah hiăng hlo eăng bâ mơngiơk hlá cơ cho mơhno tơdroăng ki nếo, koh hâk troh hneăng hôp kân. Hneăng hôp mâu kăn Đảng ƀô̆ kong pơlê Lâm Đồng rôh má 1, hneăng hơnăm 2025-2030 cho tơdroăng ki kal malối hdró tơrŭm pơla pái kong pơlê Dak Nông, Bình Thuận ƀă Lâm Đồng, djâ kong pơlê kân má môi lâp plâi tơnêi têa pơxiâm mot tung hơnăm mơnhông tâ tâng ƀă krá ton.

Pôa Nguyễn Khắc Bình, Kăn cheăng tung Ƀôrô Khu kăn pơkuâ hnê ngăn Đảng ủi Lâm Đồng, ăm ‘nâi: Hlá mơ-éa chêh dêi Hneăng hôp mâu kăn Đảng ƀô̆ kong pơlê Lâm Đồng rôh má 1, hneăng hơnăm 2025-2030 hiăng châ hbrâ nhên. Tơbleăng kal kí hiăng châ xo tơdroăng veăng hnê tối dêi Măt trâ̆n Tơnêi têa ƀă mâu khu tơrŭm cheăng kal kí, pơlê pơla; hnê tối a hneăng hôp 129 đảng ƀô̆, tơkŭm mâu khu pơkuâ hnê ngăn Đảng dêi đảng ƀô̆ kong pơlê; veăng hnê tối a hneăng hôp 128 đảng ƀô̆, tơkŭm đảng dêi Đảng xiâm kong pơlê; tơkŭm po hôp tơpui khoa hok veăng pêi, troăng hơlâ mơnhông; hlối tơmâng xo hnê mơhno dêi Tôh pêi cheăng Khu xiâm Kal kí. Tơdroăng cheăng hbrâ ăm hneăng hôp hiăng châ kong pơlê Lâm Đồng hbrâ rơnáu, pêi pro klêi.