Kong pơlê Lâm Đồng nôkố ai 180 km troăng kân ăm phêp rơxế kơtâu têi, vâ chê 1.400 km troăng kân tơnêi têa ƀă vâ chê 1.300 km troăng kong pơlê. Tung mâu rơnó mêi khía mơhot pơla kố nah a mâu troăng kân tơnêi têa a kong pơlê Lâm Đồng, môi tiah: 20, 27, 28B, 55... hiăng ai hên tíu tơhnah tơhnâp, têa lân lu pro chôm drô troăng klông.

Vâ tơniăn troăng klông prôk bâ phuâng lĕm tung rơnó mêi hơnăm kố, kong pơlê Lâm Đồng dế pêi pro séa ngăn, chêh inâi inhên rêm tíu tơ’lêi chôm troăng klông tung 8 troăng kân tơnêi têa ƀă troăng kân kong pơlê, tơdrêng amê ai troăng hbrâ ví i nhên. Vi ƀan kong pơlê Lâm Đồng hnê mơhno mâu kơ koan cheăng tơtrŏng tơniăn a mâu kơpong tơnêi tơhnah tơhnâp, têa lân lu ahdrối tơmot chiâng môi kong pơlê Lâm Đồng, Dak Nông, Bình Thuận.

Tơdjâk troh tơnêi tơhnah tơhnâp troăng tơnêi têa 14 a Gia Nghĩa, kong pơlê pơkâ drêng kong mêi khía mơhot thế xing xoăng mơngế gâk 24/24, hbrâ rơxế kơmăi kơmok teăm tơdrêng tah lôi mâu tơdroăng pá puât.