Hneăng hôp xua 6 to kong pơlê mê cho mâu bêng Xuân Hương - Đà Lạt, Lâm Viên - Đà Lạt, Xuân Trường - Đà Lạt, Cam Ly - Đà Lạt, Lang Biang - Đà Lạt ƀă cheăm Lạc Dương tơrŭm tơkŭm po, vâ tơbleăng ki ai hlâu, inâi tơdroăng tơkêa bro ƀă tơmâng rơkong tơpui tối dêi khu mơdró kâ, khu 'no liăn cheăng.

Ƀă tâi tâng ƀăng tơnêi lối 1.500 km2, pơ'leăng mâ mơngế lối 314.000 ngế, rơtế ối tung kong prâi Đà Lạt - Lạc Dương, 6 to cheăm bêng ai hyôh kong prâi tơdâng tơ'mô, ki xŏn a’ngêi tâng vâ riân ing rơgâ têa dâng 1.500m, tơ'lêi mơnhông ôm hyô pơtê pơto, pêi chiâk deăng xúa kơmăi kơmok chal nếo, kơphô̆ krúa lĕm ƀă tê mơdró ki dâi lĕm.

Hên tơdroăng tơkêa bro dế châ krếo thế mơ'no liăn cheăng tung mâu kơvâ kơphô̆, tê mơdró, ôm hyô, hngêi trăng, troăng klông. Laga, khu mơdró kâ tối tiah kố, mâu tơdroăng tơvâ tơvân ton kal rĕng châ tŏng gum. Pôa Lê Văn Cường, Kăn pơkuâ Kŏng ti pêi cheăng tiô rơnó Đà Lạt GAP tối tơdroăng ki trâm pá păng ‘nâng 'na tơnêi tơníu: 

“Ngin dế tro kreăng mê cho tơnêi, tơnêi ki mê cho tơnêi pá kong tá hâi ai mơnhên hlá mơ-éa tơnêi. Xua mê, drêng ngin pro mah kơpong xuân kreăng, ngin kal liăn vâ mung hngêi rak liăn mê hngêi rak liăn pơkâ thế ai tơmeăm khoăng, ai hlá mơ-éa xúa tơnêi".

Kơpong 5 bêng Đà Lạt ƀă cheăm Lạc Dương châ mơnhên ối hên tơnêi tơníu, tíu mơnhông kân la tơmeăm khoăng tá hâi châ xúa tơxâng. Ing mâu tơdroăng tơvâ tơvân ki khu mơdró kâ tối, pôa Nguyễn Hồng Hải, Phŏ kăn hnê ngăn Vi ƀan kong pơlê Lâm Đồng pơkâ thế mâu cheăm bêng ƀă mâu khu râ, kơvâ cheăng thế hbrâ rơnáu nhên tâ hdrối vâ tơbleăng tơdroăng tơkêa bro; séa ngăn pơkâ, luât, tơdroăng ki ai khât ‘na tơnêi tơníu, pro klêi hlá mơ-éa ƀă mâu tơdroăng vâ pêi pro, ví tơdroăng ki mơhnhôk khu 'no liăn pêi pro mê ah nếo pơtối lêi tah ki tơvâ tơvân.

“Á pâ thế khu râ kăn pơkuâ pơtăm to bêng ƀă cheăm Lạc Dương xuân môi tiah mâu kăn pơkuâ khu râ kơvâ cheăng kal athế séa ngăn nhên ‘na luât pơkâ kơphô̆. Tơdroăng ki xiâm tung mê hôm ai tiô tơdroăng púi vâ dêi khu mơ'no liăn cheăng há lơ ôh? Mơ-eăm pro ăm vâ kơ tơniăn, vâ ôh tá ai tơdroăng ki lâi ki tơdroăng tơkêa bro klêi kơ'nâi hiăng mơhnhôk mê, ah khu mơ'no liăn cheăng pêi pro klêi mê, nếo ai tơdroăng ki tơpui tối cho khu tơkŭm po tah lôi pá puât, tơvâ tơvân ăm tơdroăng tơkêa bro".

Klêi kơ'nâi hneăng hôp, khu râ kăn pơkuâ kong pơlê Lâm Đồng pơkâ thế mâu kong pơlê tơkŭm, klâ xoăng rêm tơdroăng pâ thế dêi khu tê mơdró, mơnhên nhên hnoăng cheăng pêi ƀă séa ngăn troh drêng ai tơdroăng châ tơƀrê. Kong pơlê Lâm Đồng tơhrâ pơtối rơtế prôk, tŏng kum pá puât tiô pơkâ luât, pro tíu tơ'lêi hlâu vâ mâu tơdroăng tơkêa bro châ tơbleăng pêi khât, châ tơƀrê.