A rôh hôp, Khu xiâm pơkuâ ngăn lêng kong pơlê hiăng tơbleăng mâu pơkâ dêi Ngế xiâm  pơkuâ ngăn lêng ƀă Ngế xiâm tí tăng ‘nâi plĕng ‘na tơdroăng tơkŭm po nếo, pơkâ nếo tơdroăng tơkŭm, xoăng ƀiên chế Khu kăn pơkuâ ngăn lêng râ cheăm; hlối tăng, pôk 124 ngế sih quan pro ngế kăn Pơkuâ ngăn Khu pơkuâ ngăn lêng dêi 124 to cheăm, bêng, kơpong ƀă vâ chê 500 sih quan, mâu lêng ki rơkê cheăng ton hơnăm kô rah xo pro Phŏ kăn pơkuâ ngăn, chính trị viên phŏ, ngế kum cheăng, ngế pêi cheăng.

Tơdroăng ‘mâi hơ’lêh tơkŭm rah xoăng nếo hnoăng cheăng pêi, ƀiên chế cho ki kal păng ‘nâng tung pơla tơbleăng túa mâu kăn kong pơlê 2 râ, vâ mơjiâng khu lêng rơkê iâ mơngế, pêi cheăng tơbrê, pơxúa, achê ƀă mâu cheăm bêng. Pakĭng mê, pơkâ thế mâu kăn ƀô̆ châ rah xo rĕng châ tơniăn, hbrâ tăng ‘nâi plĕng, veăng rak tơniăn cheăng lêng - kring vế tơniăn pơlê pơla.