Péa troăng kân kố tơdjêp ƀă tâi tâng xŏn 200km, klêi kơ’nâi kêi đeăng kô tơdjêp pơlê kong kơdrâm Đà Lạt (kong pơlê Lâm Đồng) ƀă pơlê kong kân Hồ Chí Minh ƀă mâu kong pơlê Đông Nam Bộ. Nôkố tŭm péa tơdroăng tơkêa bro kố pơrá dế trâm mâu tơdroăng pá puât môi tiah tâi tâng kơlo mơ’no liăn cheăng kân chiâng pro hâi khế kâi vâ tơvêh kơxô̆ liăn lối ton (lối 20 hơnăm), kơdroh tơdroăng ki hâk vâ pro dêi troăng kân ƀă mâu khu mơ’no liăn cheăng ƀă mâu khu ki ăm mung liăn, ki má lối cho mâu tơdroăng tơkêa bro tiô troăng khu tơrŭm cheăng tơnêi têa ngế krê.

Pôa Võ Ngọc Phát, Phŏ Kăn pơkuâ Khu pơkuâ troăng kân kong pơlê Lâm Đồng tối ăm ‘nâi, nôkố tíu cheăng ƀă mâu kơ koan ai hnoăng dế tơkŭm tah lôi, pâ thế mâu troăng rĕng kêi đeăng pro mơ-éa vâ mâu troăng kân ăm phêp rơxế kơtâu têi kố pơxiâm pro hdrối hâi lơ 30/4.