Tiah mê, tơdroăng tơkêa bro po rơdâ troăng prôk tâk 24,75m, mơjiâng pro klêi sap 4 troăng rơxế kơtâu, ai troăng ki ăm rơxế ối pơtê đi đo, kơtâu châ 100 km/h. Tơdroăng 'mâi hơ'lêh vâ mơ'no liăn cheăng tơdâng tơ'mô, mơdêk ivá pêi cheăng ƀă ki tơ-ƀrê xúa ton xŏn dêi troăng prôk. Tơdroăng tơkêa bro troăng prôk ai tâi tâng ki xŏn vâ chê 74 km, tíu apoăng a bêng 1 - Bảo Lộc, tơdjêp ƀă troăng kân Tân Phú - Bảo Lộc; tíu mơ'nui a cheăm Hiệp Thạnh, tơdjêp ƀă troăng kân Liên Khương - Prenn.

Rơtế ƀă po rơdâ túa pơkâ, bro tơ'nôm troh tíu tơkoh Gia Hiệp ƀă tơmeăm kuăn pơlê xúa tơdjuôm, mơdêk tơdjêp troăng prôk ƀă pro ăm  kuăn pơlê prôk lăm.

Ƀă mâu tơdroăng ki 'mâi hơ'lêh mê, tâi tâng kơxô̆ liăn 'no mơjiâng pro troăng kân tơdrăng lĕm Bảo Lộc - Liên Khương tâk vâ chê 19.000 rơtal liăn. Tung mê, kơxô̆ liăn tơnêi têa châ lối 47%, ki u ối cho kơxô̆ liăn xua khu mơ'no liăn cheăng mơhnhôk tăng. Troăng mơjiâng pro troăng xuân châ 'mâi hơ'lêh, tiô tối hdrối kô kêi đeăng a rơnó má pái cho sap khế tơpah troh khế tơchên hơnăm 2028, kô pro klêi hlối ăm rơxế kơtâu tung rơnó má 4/2028.

Drêng pro klêi, troăng kân ăm phêp rơxế kơtâu sap Bảo Lộc - Liên Khương kô chiâng troăng kân ăm phêp rơxế kơtâu tơdjêp pơla kơpong Đông Nam Bộ ƀă kơpong kong ngo Lâm Đồng, mơnhông cheăng kâ, ôm hyô ƀă tơ'mot 'no liăn cheăng.