Khu xiâm mơjiâng tơmeăm khoăng ƀă Khu xiâm ngăn túa lĕm tro, Tơ’noăng ivá ƀă Ôm hyô cho 2 tíu pêi cheăng châ Vi ƀan Kuăn pơlê kong pơlê Lâm Đồng pơcháu tơbleăng pêi mâu tơdroăng ‘na pro hồ sơ Pơkâ hdró tơdjuôm Kơpong ôm hyô tơnêi têa Mũi Né troh hơnăm 2040, mâ ngăn troh hơnăm 2050. Kơpong chêh pơkâ hdró a tơnêi 3 to cheăm, bêng, mê cho: Phú Thuỷ, Hoà Thắng ƀă Mũi Né troh hơnăm 2040, mâ ngăn vâ pêi troh hơnăm 2050. 

Kơpong chêh pơkâ hdró a 3 to cheăm, bêng, mê cho: Phú Thuỷ, Hoà Thắng ƀă ai tâi tâng tơnêi chêh pơkâ hdró lối 14.700 ha.  Pơkâ hdró mơjiâng pro, mơnhông ôm hyô tơnêi têa Mũi Né chiâng môi tíu xiâm ôm hyô râ tơnêi têa, tíu troh hên má môi dêi kơpong châu Á - Thái Bình Dương. Tiô tối hdrối troh hơnăm 2030 pơkâ tơmối ôm hyô troh akố kô châ dâng 14 rơtuh ngế, tíu ối koi pơtê dâng 41.000 veăng ƀă tơnêi mơjiâng pro mâu kơpong cheăng ki ê dâng vâ chê 10.000 ha.

Pôa Võ Thành Huy, Phŏ Pơkuâ Tíu xiâm ngăn Túa lĕm tro, Tơ’noăng ivá ƀă Ôm hyô, ăm ‘nâi, ki hrá gá troh hâi lơ 15/9 tâi tâng hồ sơ chêh pơkâ hdró va mơjiâng pro kô thế chêh klêi.