Rôh hôp tối rơdêi, tung pơla hdrối nah Đảng ƀă Tơnêi têa ôh tá pơtê tơmâng ngăn ‘no liăn pro hên tơmeăm, tơdroăng tơkêa tung kơpong hdroâng kuăn ngo, malối cho tơdroăng pơkâ tơnêi têa ‘na mơjiâng thôn pơlê nếo hiăng gum ngiâ méa thôn pơlê pơhlêh khât, tơdroăng rêh ối cheăng kâ liăn ngân ƀă tuăn mơno kuăn pơlê rế hía rế mơnhông.

Kơxô̆ rơpŏng kơtiê hlo hiăng kơdroh nôkố bu ối pá xôp 2%, tung mê rơpŏng kơtiê cho hdroâng kuăn ngo bu ối 5,4%, kơdroh lối 3% tâng vâ pơchông ƀă hơnăm 2023. Vâ pơtối mơnhông ‘na cheăng kâ ƀă tơdroăng rêh ối, teăng mâ mâu rơxông kuăn pơlê cho hdroâng kuăn ngo a kong pơlê Lâm Đồng hiăng tối hên tơdroăng, pâ thế mâu tơdroăng ki châ kơjo gum tăng cheăng pêi ăm kuăn muăn hdroâng kuăn ngo klêi kơ’nâi hiăng hriâm klêi đăi hok, kao đăng; tơdroăng cheăng hnê cheăng pêi athế tơtro ƀă tơdroăng ki ai khât; tŏng gum mơjiâng pro túa rêh kâ ối mơnhông cheăng kâ rơpŏng hngêi tơƀrê vâ po rơdâ.