Tiô Khu tơkŭm po, Tíu pêi cheăng chêh Hlá tơbeăng kô cho kông tơdjêp um méa môi Lâm Đồng pơhlêh nếo, kơhnâ, rơkê, tơrŭm ƀă mơnhông, veăng gum ‘mâi mơnhông tơdroăng loi dêi kuăn pơlê, pro chiâng ivá hâk tơngăm tơmiât troh ƀlêi chiâng dêi Hneăng hôp.

Nôkố hiăng ai 79 to tíu pêi cheăng chêh hlá tơbeăng tung kong pơlê ƀă a kong pơlê ki ê chêh inâi vâ pêi cheăng, tơbleăng tối mâu tơdroăng kal ‘na Hneăng hôp. Vâ pro tơ’lêi hlâu ăm tơdroăng pêi cheăng, Tíu pêi cheăng Chêh hlá tơbeăng châ pro a kĭng Hngêi hôp  Học viện Lục quân, ối tung bêng Lâm Viên – Đà Lạt, ƀă ai tŭm tơmeăm, troăng kơxái tơdjêp, hlá mơ-éa ki kal ƀă mâu um méa ki khât dêi hneăng hôp. Ing mê, veăng gum tơbleăng tối tơdroăng kal ‘na Hneăng hôp kô tơdjâk rơdêi tâ, trâu rơdâ tâ tung kuăn pơlê.