Tiô mơnhên tối, sap ing khế 6/2025 troh nôkố, khu ki pro bu nếo châ dâng 20% tơdroăng cheăng hrik xo ƀom min, trếo pơtôu ƀă kơchuâ chêh ‘na kih thuât; chêh pro hô sơ kơchuâ chêh kih thuât, kơchuâ hlá mơ-éa pro tá hâi klêi tiô pơkâ; khu tơrŭm kơ koan cheăng, mâu ngế cheăng hrá pơkâ, tá hâi hbrâ rơnáu tơrŭm ƀă kong pơlê.

Vi ƀan hnê ngăn kong pơlê pơkâ thế khu ki ai tơdjâk troh khu ki pro rĕng pro klêi kơ koan cheăng, xoăng tíu pêi cheăng pơkuâ ngăn tơdroăng tơkêa a kơpong Đà Lạt ƀă mâu tíu pêi cheăng; mơjiâng pro túa pơkâ, tơdroăng pro nhên, tối nhên hnoăng cheăng ki kal a khế 1/2026, tơdrêng amê hlối tơrŭm ƀă kong pơlê séa ngăn, kơjo gum pơcháu tơnêi ăm tơdroăng pro troăng.