VOV4.Xơ Đăng - Drêng ai kơxô̆ mơngế tro tâ COVID-19 tung kong pơlê tâk hên, hâi lơ 24/2, Vi ƀan kong pơlê Lâm Đồng ai mơ-éa hnê mơhno mâu tíu cheăng, Vi ƀan mâu tơring, pơlê kong kơdrâm tung kong pơlê thăm pêi pro kơtăng mâu troăng hbrâ mơdât pơreăng. Tung tơdế khế hiăng hluâ, kơxô̆ ngế tro tâ COVID-19 ki nếo a Lâm Đồng tâk hên lối 285% ƀă lối 12.000 ngế tro tâ, mơdêk kơxô̆ ngế tro tâ COVID-19 tung kong pơlê tâk lối 25.700 ngế.

Ki tơtrŏng má môi, tung kơxô̆ mâu ngế nếo tro tâ COVID-19 ki hên cho hok tro ƀă thái cô. Bu xêo sap hâi lơ 7/2 troh nôkố, tiô xêo tá hâi tŭm hiăng ăm hlo ai ki vâ iâ 1.700 ngế hok tro ƀă hrĭng ngế thái cô châ mơnhên tro tâ COVID-19.

Vi ƀan kong pơlê Lâm Đồng pơkâ Khu pơkuâ hnê hriâm ƀă hnê mơjiâng tuăn ngôa rơkê Lâm Đồng đi đo séa ngăn tơdroăng pêi pro tơdroăng hbrâ mơdât pơreăng a mâu hngêi trung hriâm, mâu tíu hnê hriâm tung kong pơlê; pơxâu phak kơtăng mâu ngế ôh tá pêi tiô pơkâ hbrâ mơdât pơreăng COVID-19 tiô pơkâ.

Vi ƀan kong pơlê Lâm Đồng xuân hnê mơhno Khu pơkuâ ngăn pơkeăng ƀă khăm pơlât kong pơlê pêi pro tơdroăng pâk vaccine hbrâ mơdât COVID-19 rĕng tâ mê nếo, ki rơhêng vâ tối thâ tơkŭm po pâk trum má 1 ƀă má 2 ăm mâu ngế 12 hơnăm tơngi klêng ƀă vêh pâk, pâk tơ’nôm ăm mơngế sap 18 hơnăm tơngi klêng, tá mâu ngế lo ing tiú ê troh. Tơniăn tung khế 2/2022 kố, 100% mâu ngế sap ing 12 hơnăm tơngi klêng châ pâk vaccine.

A Sa Ly tơplôu ƀă tơbleăng