VOV4.Xơ Đăng - Hâi lơ 10/2, Khu séa ngăn kong pơlê Lâm Đồng ăm ‘nâi dế tơrŭm ƀă mâu tíu pêi cheăng ki ai tơdjâk séa ngăn tơdroăng ki roê kế tơmeăm xúa ‘na khăm pơlât dêi 2 tíu pêi cheăng ki roê kit séa ngăn pơreăng COVID-19 dêi Kŏng ti Tơlo liăn kông ngê̆ Việt Á (Kŏng ti Việt Á) cho Hngêi pơkeăng kân II Lâm Đồng (a pơlê kong kơdrâm Bảo Lộc) ƀă Tíu xiâm séa ngăn châi tamo kong pơlê Lâm Đồng.

Tơdroăng ki roê kit séa ngăn pơreăng kố châ pêi pro tung 3 rôh, hâi khế sap ing khế 2 troh khế 8/2021, ƀă tâi tâng ai 47 rơpâu to ƀô̆ kit, tâi tâng kơxô̆ liăn lối 18 rơtal liăn. Vâ séa ngăn tơdroăng ki roê xúa mâu kế tơmeăm xúa tung khăm pơlât, pơkeăng, kit séa ngăn COVID-19 dêi tíu pêi cheăng kố châ pêi pro kơtăng tiô pơkâ, Khu séa ngăn kong pơlê Lâm Đồng hiăng ai hlá mơ-éa pơkâ thế mâu tíu pêi cheăng ki ai tơdjâk pơtroh ngế veăng, tơdrêng amê hlối pơkâ mơ’no tơdroăng ki séa ngăn tiô hnê mơhno dêi Khu séa ngăn Chin phuh.

Katarina Nga tơplôu ƀă tơbleăng