Vi ƀan hnê ngăn kong pơlê Lâm Đồng hnê mơhno mâu tơring, pơlê kong kơdrâm Đà Lạt prế Bảo Lộc pơtối séa ngăn tâi tâng mâu kơpong kuăn pơlê rêh ối, hngêi trung hriâm, hngêi pơkeăng, tíu pêi cheăng kơ koan, đông lêng a kơpong a kĭng têa kroăng, têa plông, kơpong kĭng rơnâk vâ teăm châ hlo, tối tơbleăng kơpong ki mơni kô ai tơnêi tơhnah, têa mơhiu, têa lân lu.

Malối, Vi ƀan hnê ngăn kong pơlê Lâm Đồng pơkâ thế mâu cheăm, tơring tung kong pơlê khŏm ‘mai xĕn tơdrêng mâu rơpŏng kuăn pơlê, ngế ki pêi cheăng tung kơ koan, tíu pêi cheăng a kơpong chêng ngo, kơpong ai rơnâk kân rơ-iô, mơni tơ’lêi tro tơhnah vâ rak vế khât ăm ivá châ chăn ƀă kế tơmeăm. Tơdrêng amê hlối hbrâ rơnáu pêi pro mâu túa pơkâ xing xoăng, tŏng kum, tơniăn tíu ối ƀă tơdroăng rêh ối ăm mâu rơpŏng kuăn pơlê athế châ ‘mâi xê̆n.

Krê kơpong văng Bảo Lộc, kal ai túa pơkâ ‘no tơdrêng hâi măng tung pơla kong prâi pơtối ai mêi kân, ai troăng hơlâ ‘mâi rơnêu vâ vêh tơdjêp troăng prôk rĕng má môi tâng ai tơdroăng xía vâ.