Troh nôkố tơdroăng tơkêa bro – bro krá i lĕm troăng kân Tơnêi têa 28B hiăng mơjiâng pro ok hmốu kŭn châ 44/62 km, tôh ƀê tông châ dâng 37/62 km. Tơdroăng tăng tơnêi hiăng pêi kêi đeăng 95%. Tơdroăng mơjiâng pro kố cho hrá tâng pơchông ƀă pơkâ. Xiâm kối ki xiâm cho xua mâu khu mơjiâng pro tá hâi pơtroh tŭm kơmăi kơmok, tơmeăm khoăng, mơngế pêi cheăng, tơdrêng amê khu mơ’no liăn cheăng ôh tá kơtăng hnê mơhno.

Séa ngăn inhên, pôa Hồ Văn Mười, Kăn hnê ngăn Vi ƀan kong pơlê tối rơdêi, Troăng kân Tơnêi têa 28B cho troăng kân ki mơdêk, ‘’pơkâ tơdroăng ki chiâng lơ ôh dêi Lâm Đồng tung hơnăm 2026’’, xua mê, ôh tá chiâng tối xiâm kối ki tâi ki tá hrá pơcháu tơnêi vâ tối dêi tơdroăng xua tơná pro lối hrá klêi. Pôa mơnhên: “Tâng khu mơjiâng pro ôh tá rơkê, ôh tá tơxâng pơkâ, thế pơhlêh; tâng khu mơ’no liăn cheăng ôh tá ai tŭm ivá pro pơkuâ, xuân pơkâ pơhlêh’’.

Pôa Hồ Văn Mười pơkâ mâu tíu cheăng ki tơdjâk kêi đeăng hô sơ, kĭ pơkâ troăng chêl ki u ối hdrối lơ 30/10/2025. Tơdrêng amê, tung măng tĭng kố thế mơjiâng tơdroăng mơjiâng pro inhên, tơniăn kêi đeăng tâi tâng troăng kân hdrối lơ 31/12/2025 tiô pơkâ pêi.