Kong pơlê Lâm Đồng ai ƀăng deăng kân má môi lâp tơnêi têa ƀă lối 24.200 km2 , pơkâ tơdjêp troăng klông tung hneăng mơnhông nếo cho thâ. Rơtế ƀă rơnêu, pro lĕm mâu troăng kân kong pơlê, troăng kân tơnêi têa, troăng rơxế lơtreng, tơraih tơƀai ai nôkố, tung hơnăm 2025 kong pơlê hiăng pơxiâm mơjiâng pro hên tơdroăng tơkêa bro troăng kân ăm phêp rơxế kơtâu têi tơdjêp ing Đà Lạt ƀă ing Gia Nghĩa troh Pơlê kong kân Hồ Chí Minh, mâu troăng kân ki kal ‘na 3 kơpong ki xiâm: Đà Lạt, Gia Nghĩa ƀă Phan Thiết.

Tơdroăng ki tơxâng kheăn kơdeăn mê cho khu râ kăn pơkuâ ƀă kuăn pơlê Lâm Đồng pơrá môi tuăn tơdjuôm ivá pêi pro tơdroăng pói vâ troăng kân mơnhông mơdêk. Môi tiah a cheăm Phúc Thọ Lâm Hà, ing hlá cơ apoăng cho mâu đảng viên Chi ƀộ thôn Tân Hợp, vâ chê 100 rơpŏng kuăn pơlê tung thôn môi tuăn pleăng vâ chê 23.000 m2  tơnêi dế pêt kơphế vâ khu râ kăn pơkuâ po troăng kân tơdjêp troăng kân tơnêi têa 28 ƀă troăng kân kong pơlê 725.