VOV4.Xơ Đăng - Hâi kố, hâi môi lơ 31/1, cho hâi má mơ’nui dêi khế ki apoăng hơnăm nếo 2022, xuân cho hâi má mơ’nui dêi hơnăm âm lĭt Tân Sửu, lâp tơnêi têa hbrâ koh tơdah Têt Lo hơnăm nếo hâk phiu hơnăm Nhâm Dần troh tơrêm rơpŏng hngêi.

*** Ƀă  tơdroăng mơ-eăm ôh tá lôi kuăn pơlê ki ôh tá châ kâ Tết, rêm râ kăn, kơvâ cheăng, khu grup dêi kong pơlê Kon Tum sap ing hdrối Têt vâ chê môi khế hiăng tơkŭm séa ngăn, chêh inâi mâu rơpŏng xơpá châ tŏng kum tơmeăm Têt. Têt hơnăm nếo Nhâm Dần hơnăm kố, mơhé pơreăng COVID-19 a kong pơlê Kon Tum ối tâ tú rơ-iô, la ƀă tơdroăng ki hmâ nếo, 10 tơring, pơlê kong kơdrâm dêi kong pơlê Kon Tum xuân ối kơxuô kơ-ƀăn tơxông ngiât ƀă tơkŭm po leh vâ ăm phiu ro, koh tơdah lo hơnăm nếo. Tối ‘na tơdroăng tŏng kum Têt dêi mâu kăn kong pơlê ăm kuăn pơlê tơdah Têt.

Pôa A Sip, Kăn phŏ hnê ngăn Hô̆i đong cheăm Đăk Ruồng, tơring Kon Rẫy, ăm ‘nâi:

’’Hdrối Têt, Khu kăn Hô̆i đong hnê ngăn kuăn pơlê, Vi ƀan hnê ngăn kuăn pơlê cheăm, mâu kơvâ cheăng, khu râ hiăng pêi tơdroăng séa ngăn nếo mâu rơpŏng ôh tá ai hmê kâ, xơpá, ing mê vâ tơbleăng tối ăm Đảng ủy, Hô̆i đong xuân môi tiah Măt trâ̆n tơnêi têa Việt Nam cheăm vâ ai tơdroăng tŏng kum kế kâ teăm tơdrêng, tŭm ăm mâu rơpŏng kơ klêa kơtiê, rơpŏng xơpá, vâ rêm ngế kuăn pơlê tung cheăm Đăk Ruồng ngế ki lâi xuân châ phiu ro a rơnó Têt Nhâm Dần hơnăm 2022. Nôkố, kuăn pơlê tung cheăm Đăk Ruồng hên rơpŏng hiăng hbrâ mâu tơmeăm kâ ôu tiô vâi krâ nah, rêm rơpŏng hngêi xuân châ tơkŭm kâ Têt hơniâp ro, ‘nâi kơdĭng ƀă hơniâp lĕm, mâu kăn tung cheăm ôh tá lôi rơpŏng ki lâi tro kơklêa tung mâu hâi Têt”.

*** Cheăm Dak Ndrung, tơring Dak Song, kong pơlê Dak Nông ai 4 pơlê hdroâng kuăn ngo, ki hên má môi cho hdroâng M’nông pơrá ai tơdroăng pro nhŏng o ƀă mâu kơ koan, đông lêng, ing kong pơlê troh tơring. Tung hơnăm nah, drêng pơreăng COVID-19 tâ tú, mâu kơ koan, mâu khu pơkuâ cheăng pơrá lăm pôu, hbruô tơmeăm, mơhnhôk kuăn pơlê tơkâ luâ tơdroăng xahpá. Tung mê, Khu séa ngăn ‘na hnê ngăn arak luât kong pơlê Dak Nông hiăng tơkŭm hbruô 100 kơxuô kế tơmeăm, tâi tâng kơnâ lối 30 rơtuh liăn ăm vâi krâ-nhŏng o a pơlê Bu Boong.

Pôa Điểu Minh, Kăn hnê ngăn Vi ƀan Măt trâ̆n tơnêi têa cheăm Dak Ndrung, tơring Dak Song tối ăm ‘nâi, drêng koh tơdah Têt Lo hơnăm nếo Nhâm Dần, mâu kơ koan, tíu pêi cheăng hiăng đi đo lăm pôu, tơpui tơno ƀă kuăn pơlê:

‘’Têt hiăng troh, cheăm Dak Ndrung hơniâp ro má môi ai khu kơ koan, mâu khu pơkuâ cheăng pro nhŏng o dêi kong pơlê, tơring lăm pôu. Rêm khu pơkuâ cheăng chu troh a pơlê, veăng tơlo liăn rôe chu ăm kuăn pơlê. Ki má péa nếo, mâu khu ki pro nhŏng o lăm pôu mâu krâ pơlê, kăn pơlê ƀă kăm pôu khu kăn hnê ngăn cheăm. Klêi mê, ối hnê tối, mơhno djâ kuăn pơlê pêi chiâk pêi deăng, mơnhông pêi cheăng kâ. Ki kal má môi cho hbrâ, mơdât pơreăng COVID, vâi krâ-nhŏng o ôh tá prôk lăm hên, ôh tá trâm mâu ngế ki tơviah’’.

*** A cheăm kơpong hngế hngo Kông Lơng Khơng, tơring Kƀang, kong pơlê Gia Lai, tung hâi hbrâ tơdah Têt Nhâm Dần xuân hiăng hơniâp ro. Khu Đoân droh rơtăm ƀă mâu lêng xiâm tung tơdroăng cheăng mơgrúa văng krúa klông troăng hdrối vâ troh hơnăm nếo. Tíu kố ai nhâ loăng ngiât lĕm, krúa, kơnôm ing mê kuăn pơlê hiăng vâ veăng pêi mâu tơdroăng mơhnhôk, mơjiâng thôn pơlê nếo.

Ngoh Đinh Văn Lộc, Kăn hnê ngăn cheăm Kông Lơng Khơng ăm ‘nâi: tung pơla hdrối kố nah, Khu Đoân droh rơtăm cheăm hiăng tơrŭm ƀă mâu rơpŏng tơkŭm xĕn lối 20 to kơdroăng chu pro hơngế ing hngêi ối. Chiâ 5 long ok xok. Tết Nhâm Dần, Khu đoân droh rơtăm cheăm mơhnhôk tăng 20 ngế đoân viên droh rơtăm văng krúa 5 km troăng kân tung cheăm, pêt nếo loăng ngiât vâ ai loăng xâp rơngiâp lĕm:

‘’Cho kăn hnê ngăn Đoân droh rơtăm cheăm, ngin pơtối hnê mơhno ăm chi đoân thôn pơlê hnê tối mơhnhôk đoân viên chi đoân ‘mâi rơnêu kơdrum, po văng krúa nhâ drô troăng pơlê, hơlâ troăng, kơdrum hngêi ăm krúa lĕm. Púi vâ, Têt hơnăm kố tâi tâng mâu ngế tung đoân viên chi đoân mâu thôn tơrŭm môi tuăn dêi rơpó, hơniâp ro, ôh tá ai ngế ki lâi pro xôi pơkâ dêi luât. Pin xuân hiăng hlo, pơreăng COVID-19 tâ tú rơ-iô, ngin hiăng ƀă dế pơtối hnê tối ăm mâu đoân viên droh rơtăm pêi tro tơdroăng hbrâ mơdât pơreăng COVID-19, malối cho rôh Têt, vâ veăng kum ăm rêm ngế, rêm hngêi châ kâ Tết phiu ro, ivá mo lĕm, pêi cheăng kâ châ tơ-ƀrê tâ nếo’’.

*** A cheăm Dà Sar, tơring Lạc Dương, kong pơlê Lâm Đồng, maluâ ai tơdjâk dêi pơreăng COVID-19 la xua kơphế chía to kơnâ mê tơdroăng rêh kâ ối dêi kuăn pơlê hdroâng kuăn ngo a cheăm kố pơrá tơniăn ƀă chía niân. Kơnôm ai tơdroăng veăng tơdjoâm ivá, tơrŭm dêi kuăn pơlê, mê tơdroăng pêi cheăng kâ ƀă tơdroăng hbrâ mơdât pơreăng vâ kơ ai tơdroăng rêh ối nếo, tŭm mâu tơdroăng pêi pro mê hiăng châ tơ-ƀrê, kuăn pơlê hơniâp ro, phiu niu koh tơdah hâk suâ hơnăm nếo hiăng troh.

Pôa Liêng Jrang Ha Rô Ky, Kăn hnê ngăn Vi ƀan cheăm Dà Sar tối tiah kố:

‘’Rơnó kơphế 2020-2021 xua ai pơreăng COVID-19 tâ tú tung lâp tơnêi têa, cheăm Dà Sar xuân tơdjâk hên ó. Maluâ ti mê, vâi krâ - nhŏng o xuân ối mơ-eăm rak ngăn, rơvât phon ăm kơphế. Hơnăm nah, kơphế krí bu châ iâ, laga, yă ga chía tâk kơnâ tâng vâ pơchông ngăn ƀă mâu hơnăm hdrối mê hía nah, xua mê, tơdroăng rêh kâ ối dêi kuăn pơlê tơniăn, tơdroăng pêi cheăng kâ dêi cheăm pơtối châ mơnhông, kuăn pơlê hơniâp ro ƀă sôk suâ.

Rơtế ƀă troăng hơlâ pêi tơdroăng cheăng rế mơnhông pêi cheăng kâ rế hbrâ, tơplâ, mơdât pơreăng COVID-19 tiô kơ khu râ kơpêng hiăng pơcháu, mê kuăn pơlê hiăng hlê plĕng hên ƀă pơrá veăng pêi pro hnoăng cheăng ki mê, mê tơdroăng pêi cheăng kâ ƀă hbrâ tơplâ mơdât pơreăng kô châ tơ-ƀrê, kô pêi pro châ plah hnoăng cheăng hiăng pơcháu. Xua tơdroăng kơphế chía to kơnâ yă mê hiâm mơno dêi kuăn pơlê pơrá hơniâp ro’’.

*** Môi tiah, kuăn pơlê mâu hdroâng kuăn ngo a tơring Dak Mil, kong pơlê Dak Nông hơnăm kố tơdah Têt phiu ro kơnôm châ xo ‘’hên tơmeăm pêi lo, hlối tê ai yă há’’. A pơlê  Bu Dak, cheăm Thuận An, cho tíu ai lối 315 rơpŏng ƀă dâng 1 rơpâu 200 pơ’leăng mâ mơngế, tâi tâng cho mơngế M’nông. Kơxô̆ liăn châ xo ing tơná kuăn pơlê pêi kơnôm ing kơphế ƀă báu klâng.

Pôa Y Bling Jing, Kăn hnê ngăn Đảng pơlê Bu Dak ăm ‘nâi, hơnăm kố kơphế nếo chiá to kơnâ yă, rơchôa têa Bu Dak hdrối nah châ ‘mâi rơnêu kâng lĕm, hdoăng bê têa vâ tôh chât ha báu klâng pêi 2 rơnó, tơdroăng rêh ối dêi kuăn pơlê xuân châ mơnhông tơ-ƀrê:

‘’Hơnăm ton hiăng tâi hơnăm nếo hiăng troh, kuăn pơlê xuân phiu ro kơdo mơ-eăm cheăng kâ. Mơhé ối trâm hên xơpá, la vâi krâ nhŏng o xuân mơ-eăm tơkâ luâ. Pakĭng veăng kum dêi Đảng, tơnêi têa ƀă mâu kăn cheăm tơring ngin tơmâng khât troh kuăn pơlê. Ngin hnê thế kuăn pơlê rak vế ivá, tung mê thế rak tro pơkâ 5K vâ tơniăn ôh tá ai tơdroăng xâu xía klâi. Tung rôh Têt xuân tiah mê, vâ rak vế ivá mo lĕm ăm tơná pin ƀă kuăn pơlê, vâi krâ nhŏng o rơtế ƀă dêi rơpó veăng plâ mơdât pơreăng’’.

Nhat Lisa - Gương tơplôu ƀă tơbleăng