VOV4.Xơ Đăng - Kơxê lơ 16/3, a Pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa veăng leh diâp Inâi ngế khên tơnôu tơplâ kuăn pơlê ăm pôa Lữ Minh Châu, Kăn phŏ pơkuâ liăn ngân ki má môi N2683, kăn xiâm pơkuâ hngêi arak liăn tơnêi têa Việt Nam. Teăng mâ Kăn xiâm pơkuâ Đảng, Tơnêi têa, pôa Nguyễn Xuân Phúc hiăng nhoăm diâp Inâi ngế khên tơnôu tơplâ kuăn pơlê ăm ngế teăng mâ rơpŏng pôa Lữ Minh Châu.

Xông tơpui a roh leh, pôa Nguyễn Xuân Phúc tối nhên, kô chiâng vâ tối tung tơdroăng tơplâ xâ ki khên ó má môi a tíu tơplâ peăng Hdroh tơnêi têa, ƀă drêng pro kăn xiâm phŏ pơkuâ liăn ngân ki má môi, pôa Lữ Minh Châu rơtế [ă khu pêi cheăng tung Khu rak liăn ngân ki má môi hbrâ, tơmiât pêi rơkê, pơkâ pêi tơdrêng hlối pêi pro tơtro hnoăng cheăng tơbleăng ăm Khu pơkuâ liăn ngân tơnêi têa Kơ koan xiâm peăng Hdroh tơnêi têa, ôh tá xâu pá puât, khên tơnôu, tơmiât pêi rơkê tơkâ hluâ mâu kơmăi séa ngăn krá tơniăn dêi mâu lêng ‘mêi kong têa ê vâ pơto tơniăn hrĭng rơtuh dollars, pơtroh rĕng ăm tíu tơplâ, kum teăm tơdrêng ăm mâu tơdroăng kal vâ dêi kăch măng peăng Hdroh tơnêi têa, pêi kêi đeăng hnoăng cheăng châ Khu xiâm pơkuâ kal kí, Khu xiâm pơkuâ Đảng ƀă Chin phuh loi tơngah pơcháu ăm hnoăng cheăng.

A Sa Ly tơplôu ƀă tơbleăng