VOV4.Xơ Đăng - Kơxo lơ 23/2, pơlê kong kân Hà Nội tơkŭm po kân krip leh tơbâ 120 hơnăm hâi kot mâ pôa Nguyễn Phong Sắc (01/02/1902-01/02/2022). Pơchuât hlá mơ-éa tơbâ, pôa Đinh Tiến Dũng, kăn pơkuâ ngăn Đảng pơlê kong kân Hà Nội hiăng hơ’muăn tơdroăng pêi cheăng kăch măng dêi pôa Nguyễn Phong Sắc; tối nhên tơdroăng ki ƀlêi trâng dêi tơdroăng Xô Viết Nghệ Tĩnh vê hdró dêi kơpong pơkuâ ngăn Đảng Trung Kỳ ki malối cho hnoăng cheăng dêi kăn pơkuâ ngăn Đảng uỷ Nguyễn Phong Sắc, cho tơdroăng ki mơhno tối ‘na ivá pơkuâ, hnê tối mơhnhôk, tơkŭm kuăn pơlê, mơhnhôk khu lêng tơkŭm po hnoăng tơplâ dêi kăch măng, dêi kuăn pơlê Nghệ Tĩnh tiô hiâm mơno Hồ Chí Minh.

Hlâ drêng nếo 29 hơnăm, la tơdroăng rêh ối ƀă hnoăng cheăng kăch măng khên tơnôu dêi pôa xuân ối rêh đi đo tung tơdroăng tơplâ kăch măng dêi hdroâng mơngế.

Katarina Nga tơplôu ƀă tơbleăng