VOV4.Xơ Đăng - Khu xiâm pơkuâ Kŏng an nếo tơkŭm po Leh tơbâ 20 hơnăm Hâi mơjiâng Kơ koan Viƀan séa ngăn Đảng ủy Kŏng an Tơnêi têa. Tơkâ hluâ 20 hơnăm mơjiâng, xông kân mê kơ koan kố hiăng tơbleăng tơdroăng pơkuâ, hnê mơhno ‘na séa ngăn, ti tăng plĕng nhên, pơxâu phak mơngế tung Đảng tung Kŏng an kuăn pơlê. Kơ koan Viƀan séa ngăn hiăng hbrâ tơbleăng Đảng ủy Kŏng an Tơnêi têa tơbleăng, po rơdâ pêi pro hên pơkâ séa ngăn, ti tăng plĕng nhên tơdroăng, séa ngăn drêng ai tơdroăng pro xôi.

Pôa Tô Lâm, Ngế xiâm pơkuâ kŏng an xông tơpui a leh tơbâ

Ing mê, kum hên khu râ kăn pơkuâ hnê ngăn cheăng Đảng, Khu Đảng, đảng viên teăm hnê pât tơdrêng, rơnêu mâu tơdroăng ki tá hâi tro, ôh tá ăm pro xôi kŭn chiâng pro xôi kân.

Xông tơpui a roh Leh, pôa Tô Lâm, Ngế xiâm pơkuâ Kŏng an pơkâ thế tung la ngiâ, Kơ koan Viƀan séa ngăn Đảng ủy Kŏng an Tơnêi têa kal pơtối hlê plĕng pêi pro troăng ‘’séa ngăn thế po rơdâ, pơxâu phak thế ai xiâm kối, xiâm rêi’’. Tơdrêng amê thăm séa ngăn, ti tăng plĕng nhên tơdroăng pơkuâ, hnê mơhno, tơkŭm pêi pro tơdroăng mơjiâng, pơ’lêh tung Đảng ƀă khu cheăng kal kí; khŏm mơdât, troh tah, pơxâu phâk kơtăng kăn ƀô̆, đảng viên ai tơmiât ôh tá tro ‘na kal kí, hiâm mơno, tơdroăng rêh ối.

A Sa Ly tơplôu ƀă tơbleăng