Djâ ngin vêh lăm pôu mâu tíu tơplâ 50 hơnăm hdrối, mô đô̆i hneăng hdrối nah Đinh Nhiêu a cheăm Ia Yeng, tơring Phú Thiện, xuân ối pâ tung ngôa roh plâ xâ a troăng kơxô̆ 7. Drêng mê nah, pôa cho Trung đô̆i trương Trung đô̆i 2, C1, H11 ối tung Tĭnh đô̆i Gia Lai – Kon Tum.  Pôa Đinh Nhiêu hơ’muăn: klêi kơ’nâi lêng tơnêi têa pin tơleăng lĕm Ƀuôn Ma Thuột, lối 15 rơpâu lêng kong têa ê xâu kơtâu ing Kon Tum ƀă Pleiku chu a tơbăng ing troăng kân 7. Khu lêng mê xâu préa ó drêng tro lêng pin plâ ƀâ, plâ troh:

‘’Drêng mê nah khu lêng kong têa ê cho tâi tâng khu lêng laga ôh tá tơniăn lĕm, drêng mê rơxế kom ƀa, tơmeăm tơplâ kơmăi kơmok prôk hmâng vâ ôh tá tro troăng, ôh tá ai ngế hnê mơhno, drêng mê nah, pháu hnêa, tơmeăm tơplâ kơmăi kơmok pêng troăng kân. Drêng mê nah, mô đô̆i ki xiâm, mô đô̆i kong pơlê pơrá kât kên rơbông peăng kŏng hơ-ếo, tâng ôh tá ai kên rơbông mê ôh tá xê lêng pin’’.

Drô troăng kân 7, mâu tíu môi tiah kông Sông Bờ, kông Cây Sung, văng Tô Na... hiăng chiâng tơdroăng ki xâu dêi khu lêng thu tung tơplâ. Mô đô̆i hneăng hdrối nah Ksor Chư, drêng mê ối tung Trung đoân 48, Sư đoân 320, Kuân đoân 3, rơrêk tung hiâm mơno vêh pâ ƀlêi trâng hơnăm mê nah:

“Drêng tâng tơdroăng ki thâ cho Kuân đoân 2 ngŭi kơtâu hdâ a troăng 7, mê cho đông lêng gâk tâ tá, kơnŏng pơtôu rêm pŭm. Drêng mê tung đông ngoh Tạ Tấn, Chính ủy pơkâ ngoh Chư xo rơxế lăm tŏng kuăn pơlê, á pêi tiô pơkâ. Tâ rơrêk tung hiâm mơno plâ ƀâ mê nah cho tá kâi tối ôh, á hâk tơngăm xua á hiăng pêi châ môi tơdroăng tŭm têk dêi tơdroăng rêh ối á’’.

Drêng lêng pin plâ ƀâ kơtăng, khu lêng kong têa ê ki ối rêh kơtâu hdâ lâp kong kế. Hên tíu, lêng kong têa ê kât xêh dêi kŏng, toi dêi pó lo a troăng 7 têk hlá cơ rơbông ôh tá khên xếo. Tung tơdroăng ki pâ vế dêi Đăi tă Nguyễn Vi Hợi, Ngế khên tơnôu Khu lêng kuăn pơlê, lêng Trung đoân 64, Sư đoân 320, Kuân đoân 3, mâu hâi khế 3 hơnăm 1975 ƀă mâu roh tơplâ xâ râ ó laga pêng tơdroăng ki hâk tơngăm:

“Roh tơplâ râ ó má môi ki á veăng cho hâi lơ 17 ƀă 18/3, péa hâi mê cho mơdât khu lêng Kuân đoân 2 dêi Việt Nam Kŏng hoa a drô troăng kơxô̆ 7. Drêng mê đi đo mơnhên troăng tơmiât cho tơleăng lĕm peăng Hdroh tơnêi têa. Drêng mê, tung tơplâ xâ ngin ôh tá tơmiât ki klâi troh tơdroăng ki pleăng dêi châ chăn mơheăm chá, drêng lâi hlâ mê hlâ, drêng lâi tro rong mê tro rong, cho đi đo tơrŭm môi tuăn vâ veăng tơplâ’’.

Ƀlêi trâng Troăng kân 7 hiăng kum kal khât tung ƀlêi trâng Tây Nguyên, po roh roh ton xŏn vâ khu lêng ƀă kuăn pơlê pin mơdêk rĕng roh plâ ƀâ ƀă xông tơplâ rơnó Hơngui 1975, tơleăng lĕm peăng Hdroh, môi tuăn tơnêi têa. Hiăng 50 hơnăm hiăng hluâ, troăng 7 - troăng kân nah châ hlo mâu tơdroăng ƀlêi trâng kân, nôkố hiăng chiâng Troăng kân tơnêi têa 25, môi troăng kân ki xiâm tơdjêp Gia Lai ƀă mâu kong pơlê duyên hải miền Trung. Pôa Rah Lan Chung, Kăn hnê ngăn Vi ƀan kong pơlê Gia Lai, tối ‘na tơdroăng mơnhông dêi kong pơlê a troăng kân kố:

“Troăng kân Tơnêi têa 25 – troăng 7 pơla kố nah hiăng châ pro lĕm, nôkố troăng kân kố tơdjêp chu kong pơlê Phú Yên rơxế prôk tơ’lêi hlâu. Nôkố tung pơkâ pêi ƀă mơnhên troăng mơnhông dêi mâu tơring tung kong pơlê tơkâ hluâ troăng kố tá Phú Thiện, Ayun Pa, Krông Pa, mê troăng mơnhông dêi mâu tíu kố pơrá mot troăng ki xiâm kố. Kơpong kố hiăng mơjiâng mâu kơpong kuăn pơlê rêh ối tê mơdró kơdrâm. Tơdroăng rêh ối kro ƀă ai tơdroăng mơnhông tâng pơchông ƀă mâu hơnăm hdrối cho hên, kuăn pơlê phiu ro, rơtế Đảng, Tơnêi têa pêi pro mâu troăng hơlâ ‘na mơnhông cheăng kâ, mơdêk tơdroăng rêh ối’’.

Kơpong ‘nâi Cheo Reo nôkố hiăng pro dêi tơná chiâng ngiâ méa nếo. Mơngiơk ngiât kân rơdâ dêi loăng plâi ƀă mâu toăng hngêi krá kâk tiô rơxông nếo hiăng xut tah dêi môi rơxông nhôi on xua tơplâ tơplong, dế chôa ‘lâng pơhlêh dêi tơná chiâng kơpong ki mơnhông cheăng kâ peăng Mâ hâi lo Pá hdroh kong pơlê.