Kơmăng lơ 11/9, a Tokyo, Kơ koan teăng mâ Việt Nam a kong têa Nhuk tơkŭm po kân krip Leh tơbâ 80 hơnăm Hâi mơjiâng tơnêi têa Kŏng hoa xah hô̆i chuh ngiah Việt Nam, ƀă tơdroăng veăng dêi dâng 500 ngế teăng mâ ăm Chin phuh, mâu kơ koan, khu tê mơdró, kong pơlê, khu chêh hlá tơbeăng kong têa Nhuk ƀă mâu kơ koan tơpui kâ kong têa ê a kong têa Nhuk.

Xông tơpui a roh leh, Kăn teăng mâ pôu râng tâi tâng hnoăng Việt Nam a kong têa Nhuk Phạm Quang Hiệu tối hâi khế ki eăng 80 hơnăm hdrối nah ƀă ối a ‘ngêi cho hâi lơ 2/9/1945 ƀă troăng prôk ki pá puât, laga xuân pêng păm tơdroăng ki hâk tơngăm ƀă mâu tơdroăng châ tơƀrê dêi tâi tâng hdroâng mơngế Việt Nam.

Teăng mâ ăm peăng kong têa Nhuk, pôa Fukuyama Tetsuro – Phŏ Kăn hnê ngăn Kuô̆k hô̆i râ má môi kong têa Nhuk rơkâu Việt Nam klăng 80 hơnăm Hâi mơjiâng tơnêi têa, tối tơdroăng ki ía ‘nâng ƀă mâu tơdroăng ki châ tơƀrê Việt Nam hiăng châ tơƀrê tung pơla kố nah, tơdrêng amê mơnhên tơdroăng pói vâ trâu hơngế tơ’nôm tơrŭm cheăng ƀă Việt Nam tung la ngiâ.