Kơxo hâi lơ 5/9, a Tíu xiâm Hneăng hôp Tơnêi têa (Hà Nội), Khu xiâm pơkuâ hnê hriâm ƀă Hnê mơjiâng tuăn ngôa rơkê tơkŭm po Leh tơbâ 80 hơnăm khôi túa lĕm tro vâi krâ nah Hnê hriâm ƀă pơxiâm po hơnăm hriâm 2025 – 2026.

Kố cho roh apoăng, vâ chê 30 rơtuh hok tro, sinh viên rơtế 1,7 rơtuh thái cô tung lâp tơnêi têa veăng leh pơxiâm po hơnăm hriâm tơdjuôm, tơdjêp tơdrêng tung um tiô troăng hyôh măng, rơtế koh hlá cơ ƀă rơhdruê Quốc ca.

Veăng leh ai pôa Tô Lâm, Kăn xiâm pơkuâ hnê ngăn Đảng, pôa Lương Cường, Kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn tơnêi têa, pôa Trần Thanh Mẫn, Kăn xiâm hnê ngăn Kuô̆k hô̆i rơtế khu râ kăn pơkuâ, Kăn pơkuâ Đảng, Tơnêi têa; teăng mâ mâu khu xiâm, kơvâ cheăng ƀă mâu khu pêi cheăng lâp plâi tơnêi a Việt Nam.

Hơnăm hriâm 2025 – 2026 châ mơnhên cho hơnăm hriâm apoăng pêi pro mâu tơdroăng pơkâ ki kal dêi Đảng ƀă Kuô̆k hô̆i, tung mê, ai Tơdroăng pơkâ ‘na hnê hriâm mâm non ăm vâi hdrêng 3 – 5 hơnăm, Luât Ngế hnê hriâm ƀă troăng hơlâ tê kơtê, tŏng gum tê kơtê. Kơvâ hnê hriâm mơnhên tơdroăng pơxá hơnăm hriâm 2025 – 2026 cho ‘’Mâu pơkâ rak tơniăn pơlê pơla – Tơmiât pêi rơkê – Pro pơhlêh ó rơdêi – Mơnhông mơdêk’’ ƀă 10 hnoăng, troăng pêi ki xiâm vâ pêi pro châ tơƀrê mâu troăng hơlâ, troăng pơkâ pêi dêi Đảng ƀă Tơnêi têa ‘na hnê hriâm ƀă Hnê mơjiâng, pêi pro ƀlêi trâng mâu pơkâ mơ’no.

Leh tơbâ 80 hơnăm tiô khôi vâi krâ nah kơvâ Hnê hriâm ƀă pơxiâm po hơnăm hriâm 2025 – 2026 ôh tá xê to vêh tơbâ khôi túa vâi krâ nah, mơnhên mâu tơdroăng veăng gum kân dêi kơvâ hnê hriâm ƀă tơdroăng hnê hriâm kăch măng dêi Đảng ƀă Tơnêi têa pin mê ối cho roh vâ mơnhông hnoăng tung tâi tâng kơvâ hnê hriâm krê ƀă tâi tâng pơlê pơla ahdrối pơkâ mơnhông dêi tơnêi têa tung chal nếo.