Pơchuât hlá mơ-éa a rôh leh, pôa Tô Lâm, Kăn xiâm pơkuâ hnê ngăn cheăng Đảng tối nhên, luâ 80 hơnăm pá puât la hâk tơngăm, pin hiăng tối rơdêi tơdroăng: xua hlá cơ tơniăn krê dêi Đảng ƀă troăng bâ eăng Hồ Chí Minh séa ăm, xua ivá rơdêi dêi kuăn pơlê ƀă khâu tơrŭm tâi tâng hdroâng mơngế, ôh ti ai xơpá, pơloăng ki lâi, pin ôh tá châ pêi tơƀrê, la ôh ti ai tơdroăng lĕm ki lâi ki hdroâng mơngế pin ôh tá pêi tơƀrê.

Klêi kơ’nâi pơchuât dêi pôa Tô Lâm, kăn xiâm pơkuâ hnê ngăn cheăng Đảng tối, rôh leh pơtối ƀă Tơdroăng ăm lêng prôk a troăng tơbâ 80 hơnăm Kăch măng khế tơheăm ƀlêi trâng 19/8 ƀă mơjiâng tơnêi têa Kŏng hòa xah hô̆i chuh ngiah Việt Nam 2/9 ƀă tơdroăng veăng ai mâ dêi dâng 30 rơpâu ngế, tung mê ai tá khu lêng, kuăn pơlê prôk a troăng sap ing mâu kong têa ki châ krếo thế cho Sinuâ, Rusi, Lếo, Kul.

Leh tơbâ môi hdroh nếo tối rơdêi chuh ngiah Việt Nam ôh tá hía; vâ hiâm mơno mê đi đo cho tơdroăng hâk tơngăm, cho ivá hnan thế tâi tâng hdroâng mơngế Việt Nam pơtối hiâm mơno, tơdroăng púi vâ tơniăn krê, hơniâp lĕm dêi pâ pôa, tơbêng hiâm mơno khên tơnôu, tuăn ngoâ rơkê, pơhlêh nếo, tơmiât pêi rơkê ôh tá pơtê, khŏm mơ-eăm mơjiâng môi Việt Nam mơnhông tŭm têk, krá ton tung chal nếo, chal ki mơ-eăm tơná dêi hdroâng Việt Nam.