Hâi lơ 21/2, a Pơlê kong kân Hồ Chí Minh, Vi ƀan hnê ngăn kong pơlê Dak Lak hiăng tơkŭm po roh hôp tối pơtâng tơdroăng ‘na Leh tơbleăng kơphế Buôn Ma Thuột má 9 hơnăm 2025, ƀă dó inâi: “Buôn Ma Thuột-Tíu ki troh dêi kơphế lâp plâi tơnêi”. Pêi pro ton ai 5 hâi, ing hâi lơ 9 troh lơ 13/3. Leh tơbleăng kơphế Ƀuôn Ma Thuột roh má 9 hơnăm 2025 ai hên tơdroăng ki nếo tâng pơchông ngăn ƀă mâu roh po hdrối mê hía nah, tiô riân ngăn ahdrối kô ai dâng 200.000 ngế tơmối troh hyô ngăn. Ai hên tơdroăng cheăng dêi Leh tơbleăng roh kố kô châ pói tơngah cho ivá ki nếo ăm tơdroăng ki mơnhông pêi cheăng kâ dêi kong pơlê Dak Lak.

Klêi kơ’nâi 8 xoh tơkŭm po, Leh tơbleăng kơphế Ƀuôn Ma Thuột hiăng chiâng môi tơdroăng ki nếo dêi kơphế Việt Nam, châ tơdjâk hên tơdroăng, pro hên tơdroăng ki lĕm tro ăm kuăn pơlê, tơmối tung tơnêi têa ƀă kong têa ê. Tơdroăng kố xuân cho hnoăng cheăng pêi pro ai pơxúa kân khât vâ koh tơbâ 50 hơnăm Hâi Ƀlêi trâng Buôn Ma Thuột, pro tơleăng lĕm kong pơlê Dak Lak (10/3/1975 - 10/3/2025).

Leh tơbleăng kơphế hơnăm kố kô ai 17 tơdroăng cheăng ki xiâm: Po kơchơ mơđah tơbleăng ‘na kơvâ kơphế  ƀă tơmeăm ki hiăng châ mơnhên OCOP; hneăng tơ’noăng kơ-óu kơphế ki xú pơ-ou; roh hôp tơrŭm tê mơdró lâp plâi tơnêi-tơdjêp tơ’môe, mơdêk ki kơnía dêi kơphế Việt Nam; ôu kơphế ôh tá hrê liăn a maua kuăn kơphế tung lâp kong pơlê; Hneăng tơ’no vo plong loăngu a tơring Lăk; Hneăng tơ’noăng khu rui xah hêi Ƀuôn Đôn ƀă hên hĕng mâu tơdroăng xah ôm hêi ki ê.

Pôa Trần Hồng Tiến-Kăn hnê ngăn Tuá lĕm tro, Tơ’noăng Ivá ƀă Ôm hyô kong pơlê Dak Lak tối ăm ‘nâi, tiô tối hdrối, Leh tơbleăng kơphế hơnăm kố kô ‘mot dâng 200.000 ngế tơmối. Pakĭng tơdroăng ki châ ngăn ‘na mơdâ pêt, krí, uâ mơdiê, kơ-óu kơphế, mê tơmối ối châ ngăn tung Leh tơbleăng kố hên tơdroăng ki ê dêi pơlê pơla, cheăm bêng hdroâng kuăn ngo.