Rơnó tơdah lêng hơnăm 2025 kố a Dak Lak ai 2.553 ngế lêng pêi hnoăng cheăng a mâu tíu cheăng lêng ƀă mô đô̆i gâk kring tơkăng kong ối tung kong pơlê Dak Lak, rơtế mâu tíu cheăng ối tung Khu xiâm pơkuâ lêng, Kuân khu V pro đông tung kong pơlê. Đăi tă Niê Ta, Kăn pơkuâ Khu pơkuâ lêng, Phŏ Kăn hnê ngăn Hô̆i đong pro lêng kong pơlê Dak Lak tối ăm ‘nâi, tung rơnó pơtâp lêng kố, mâu kơ koan, tíu cheăng kô tơkŭm pêi tơtro tơdroăng kal kí ƀă troăng tơmiât, mơdêk hnoăng cheăng dêi mâu râ, pơkuâ, kăn ƀô̆, mâu lêng ƀă hnoăng cheăng hnê pơtâp lêng.

Drêng kố, mâu tíu cheăng hiăng tơdah tŭm kơxô̆ ƀă dế pêi pro mâu yăo án, ƀai hnê, troăng pêi ki kal khât, tơniăn mơdêk hnê cheăng lêng ƀă mâu lêng nếo. Ƀă mâu lêng nếo, hiăng tơniăn troăng tơmiât, tơdroăng tuăn pâ klêi kơ’nâi mâu hâi apoăng hơngế rơpŏng, hbrâ mot a tíu pơtâp lêng.