Tiô tối hdrối, tung khế Droh rơtăm hơnăm kố kô ai lối 36 rơpâu 900 ngế pleăng hnoăng cheăng tơná pro mâu tơmeăm khoăng, peăng tơdroăng cheăng droh rơtăm rêm râ, ƀă tâi tâng kơxô̆ liăn mơni lối 293 rơtal liăn.

Ki tơxâng vâ tối, Khế droh rơtăm hơnăm kố pêi hên tơdroăng ki nếo; mê cho tơbleăng mâu tơdroăng cheăng kơjo kum pêi pro tơdroăng mơhnhôk tơ’noăng “tơdjuôm ƀă dêi rơpó xut tah hngêi pơtân, hngêi xhi kơchoh” tung lâp tơnêi têa tung hơnăm 2025; tơkŭm tơbleăng rôh pêi cheăng hên ‘’500 hâi măng tơ’noăng pro klêi 3.000 km troăng  kân tơdrăng lĕm” veăng ‘no hnoăng pêi tơdroăng pro hên troăng prôk dêi tơnêi têa.

Malối, mâu tơdroăng cheăng kô tơkŭm pêi ai pơxúa Pơkâ kơxô̆ 57 dêi khu xiâm kal kí ƀă ki tơƀrê ‘na khoa hok, kơmăi kơmok hơ’lêh nếo ƀă pơlêh kơxô̆ dêi tơnêi têa.