VOV4. Xơ Đăng - Pơreăng mơhé tơdjâk ôh tá lĕm tro troh tơdroăng pêi cheăng, laga klêi kơ’nâi Têt mê mơngế pêi cheăng hiăng vêh tíu pêi cheăng tro hâi khế pơkâ. Tơkŭm tâi tâng rĕng tung lâp tơnêi têa ăm hlo, ai troh lối 90% kŏng nhân, mơngế pêi cheăng tung tơnêi têa hiăng vêh pêi cheăng klêi kơ’nâi Têt. Hên khu tê mơdró hiăng vêh pêi cheăng, pơxiâm pêi cheăng sap hâi má 5 Têt. Kơxô̆ ki ê, ki hên cho pơxiâm mot pêi cheăng hâi má 7 ƀă hâi 8 Têt.

A kong pơlê Bình Dương, mâu khu tê mơdró hiăng tơdah kŏng nhân vêh pêi cheăng sap ing hâi má 7, má 8 Têt. Pơtối mê, kơxô̆ mơngế pêi cheăng vêh pêi cheăng klêi kơ’nâi Têt troh hâi khế pơkâ dêi khu tê mơdró cho hên, mơngế vêh pêi cheăng sap ing 80 troh 90%. A mâu kong pơlê ai kơpong hngêi kơmăi kơmok kân môi tiah: Đồng Nai, Pơlê kong kân Hồ Chí Minh, kơxô̆ kŏng nhân vêh pêi cheăng xuân châ pá kơdâm 90%.

A Hà Nội, tiô rah chêh dêi Liên đoân pêi cheăng pơlê kong kơdrâm: Xêo troh hâi lơ 7/2, lối 90% kơxô̆ khu tê mơdró hiăng po tíu pêi cheăng vâ mơjiâng tơmeăm ƀă lối 96% kơxô̆ kŏng nhân pêi cheăng vêh pêi cheăng.

A Sa Ly tơplôu ƀă tơbleăng