Thôn Trà Cong, (tơring An Lão ton)  a chêng ngo Gai. A kôi ngo ƀă hbêa ngo, hên mâu hmốu kân kŭn, hbrâ dêi pó, tơ’lêi króu drêng tơnêi tơhnâp drêng kong mêi kân ton. Jâ Nguyễn Thị Hoa, ngế kuăn pơlê ối a thôn Trà Cong ăm ‘nâi, jâ ƀă hên ngế hiăng hlo ƀă mâ hên rôh tơnêi tơhnâp, tơnêi hmối króu ing kối ngo pro tât troăng, tơ’nhiê troăng prôk.

“Tâng tơnêi tơhnâp môi pŭm hmốu ing ‘ngêi króu klêi mê kô chiâng ai hên mâu hmốu ki ê veăng króu. Drêng mê kuăn pơlê a kố ôh ti ‘nâi kơtâu peăng lâi. Ngo rơnâk ‘nâng  kô pro hmốu króu troh a troăng kân hlối, hâi tối klâi tung thôn”.

Jâ Phạm Thị Lệ Thùy, Phŏ Kăn hnê ngăn Vi ƀan Kuăn pơlê cheăm An Hòa ăm ‘nâi, Trà Cong cho môi tung tơdrốu to thôn ki tơ’lêi tro tơnêi tơhnâp, ai mâu tíu tơhnâp ki rơ iô. Kong pơlê hiăng hbrâ rơnáu troăng hơlâ vâ djâ kuăn pơlê lăm ối a tíu tơniăn tâng ai tối hdrối tơnêi kô tơhnâp:

“Ngăn tiô tối tơbleăng kơlo ki rơ iô gá ó to kéa lâi, cheăm kô pêi pro mâu tơdroăng tiô kơ troăng hơlâ hiăng kĭ vâ  tơniăn tâng lơ djâ kuăn pơlê lăm ối tíu ê, ối a tíu tơniăn ăm kuăn pơlê. Mê cho mâu hngêi trung hriâm, tíu pêi cheăng dêi kơ koan a thôn Xuân Phong Nam, thôn Vạn Long, thôn Vạn Khánh’’.

Tơdrêng ƀă tơdroăng tơ’lêi tơnêi tơhnâp, thôn pơlê cheăm a kong ngo ối a peăng mâ Mâ hâi lo kong pơlê Gia Lai  ối tơ’lêi tro têa rơlêa kân rơdêi môi hdrôh, têa rơlêa drêng ai kong mêi kân. Vâ tối mê cho a kơpong têa Krơng Nước Ói, thôn 1, cheăm An Toàn. A rơnó mêi têa lân lu, têa krơng tâk đik, hiu têi; hdrối nah hiăng ai hlâ mơngế.Vâ kơdroh xía vâ, hdrối vâ troh rơnó mêi khía kân, mâu kăn cheăm kong pơlê hiăng chêh tơbleăng mơhno hdrối, ăm mâu ngế gak ngăn, kring tơniăn ăm thôn gak ngăn rêm hâi, ôh tá ăm kuăn pơlê prôk luâ drêng têa kân dế tâk đik. Ngoh Đinh Văn Bằng- thôn trương thôn 1, cheăm An Toàn ăm ‘nâi:

“Cheăm ai khu lêng kuăn pơlê gak ngăn, a thôn ai đô̆i kring tơniăn ƀă mâu rơtăm veăng gak ngăn a mâu têa krơng ki rơ iô. Tối ăm kuăn pơlê thế rak tro luât pơkâ hbrâ mơdât xía vâ ‘na têa lân lu khía mơhot kân, pôi tá ăm kuăn pơlê prôk luâ drêng têa krơng dế tâk đik”.

Pôa Nguyễn Văn Vân - Phŏ Kăn hnê ngăn Vi ƀan kuăn pơlê cheăm An Toàn ăm ‘nâi, xua đi đo thế hbrâ ví xía vâ xua kong prâi pro ôh tá tơniăn, cheăm đi đo hbrâ rơnáu mâu lêng, rơxế plong, ếo chá tơmeăm vâ tŏng gum tơdrêng tâng ai mâu ngế trâm xía vâ. Pakĭng mê, râ ủy, mâu kăn cheăm An Toàn xuân hbrâ rơnáu vâ djâ kuăn pơlê lăm ối tíu ê drêng tâng tối tơbleăng kô ôh tá tơniăn xua kong prâi pro.

“Cheăm hiăng mơjiâng troăng hơlâ hbrâ rơnáu, drêng ai khía kân, cho ăm mâu lêng gak ngăn. Drêng hlo tơniăn mê kô ăm kui trâp drô thông têa vâ kuăn pơlê ăm rơxế chiâng kơtâu. Drêng tơnêi hmốu króu ing ‘ngêi troh a nâi hên  thế ai rơxế kul tah, ngin thế tăng mơngế pêi mơhá ăm vâi liăn, mung mâu khu mơdró troh ƀă mâu rơxế vâ kui tơnêi, kui trâp kum kuăn pơlê vâ tơniăn ăm kuăn pơlê ƀă tơmeăm drêng prôk tơkâ luâ troăng ki mê”.

Ki khât ăm hlo, a Gia Lai, tơdroăng cheăng hbrâ ví xía vâ kong prâi pro ôh tá tơniăn đi đo châ tơbleăng pêi tiô kơpong. Kơpong kĭng têa kroăng Ba, kroăng Ayun lơ rơtâ tá long Ayun Hạ tơmâng khât troh tơdroăng djâ kuăn pơlê lo ing kơpong tro têa lu, lăm ối a tíu ê, ngăn mâu rơchôa kâng têa, mâu long rơchôa ki kân hôm tơniăn. Kơpong achê têa kơxĭ, têa long, têa kroăng kân mê tơkŭm tăng ngăn rĕng tơbleăng hdrối, tơniăn ‘na troăng prôk págong, troăng têa ƀă kring vế ká xi xŏng kuăn pơlê păn. Tung pơla mê, a mâu cheăm kong ngo môi tiah An Hòa, An Toàn kô séa ngăn mâu tíu ki tơ’lêi tro tơhnâp ƀă hbrâ mâu troăng hơlâ djâ kuăn pơlê lăm ối tíu ê drêng ôh tá tơniăn. Hbrâ ví kong mêi khía mơhot a Gia Lai xua mê ôh tá xê to hbrâ ví ƀă kong prâi pro ôh tá tơniăn, mê ối cho rak ngăn vâ ’nâi ki oh tá mơhúa, ki xía vâ ‘na tơnêi tíu a tơrêm kơpong.