Nâ Cil Sa La Môn (hdroâng kuăn ngo K’Ho) a cheăm Dam Rông 4, kong pơlê Lâm Đồng hâk tơngăm châ ối tung khu dêi Đảng drêng dế cho sinh viên hơnăm má mơ’nui dêi Hngêi Trung Đăi hok Đà Lạt. Hơnăm 2015, klêi kơ’nâi mơgêi lo hngêi trung, nâ vêh pêi cheăng a cheăm Dà Long ton, nôkố ối tung cheăm Dam Rông 4. Tung 10 hơnăm veăng pêi cheăng Đoân ƀă Khu pơkuâ vâi kơdrâi cheăm, nâ Cil Sa La Môn hiăng ai hên troăng tơmiât pêi rơkê, veăng gum ăm tơdroăng mơnhông cheăng kâ – rêh ối pơlê pơla tối tơdjuôm, tơdroăng ki rơkê dêi nâ o vâi kơdrâi tối krê.

Khu pơkuâ vâi kơdrâi cheăm hiăng mơjiâng hên troăng pêi “Tôh tơdjêp vâi kơdrâi pêt loăng yâu păn hdrong’’, mơhnhôk lối 25 ngế vâi kơdrâi veăng pêi. Tơdâng rêm rôh păn châ dâng sap ing 6 troh 8 rơtuh liăn. Tôh hiăng kum 7 rơpŏng ối tung khu hluăn ing kơtiê kơnôm pêt yâu păn hdrong. Nâ Cil Sa La Môn tối:

“Á pói vâ troh lâp lu tơdroăng hlê plĕng dêi á troh pú hmâ, kuăn pơlê hdroâng kuăn ngo dêi á. Ing tơdroăng pêi cheăng dêi á vâ kuăn pơlê ki rơhêng vâ tối cho hdroâng kuăn ngo hlê plĕng troăng hơlâ ki lĕm dêi Đảng ƀă Tơnêi têa cho pói vâ mơdêk tơdroăng rêh ối cheăng kâ ăm kơpong kuăn pơlê hdroâng kuăn ngo’’.

Bă nâ Cil Pam K’Quyên (hdroâng kuăn ngo K’Ho), kot mâ hơnăm 1989, ối a cheăm Lạc Dương, kong pơlê Lâm Đồng, klêi kơ’nâi mơgêi Hngêi trung Đăi hok Yersin Đà Lạt, hơnăm 2013, nâ vêh ƀă pơlê pơla  veăng tơdroăng pêi cheăng a pơlê. Ing mê  nah troh nôkố, nâ hiăng pêi hên tíu cheăng môi tiah pro Kăn pơkuâ thôn Dà Blah, cheăm Dà Nhim (ton), klêi mê Kăn pơkuâ hnê ngăn Đoân Droh rơtăm cheăm, Kăn hnê ngăn Khu kuăn pơlê pêi chiâk deăng cheăm, Kăn hnê ngăn Vi ban Măt trâ̆n Tơnêi têa Việt Nam cheăm Dà Nhim hlối pro Kăn pơkuâ Chi bô̆ thôn Dà Blah.

Tung tơdroăng pêi cheăng, nâ Cil Pam K’Quyên hiăng thăm pơtâng tối, tơbleăng mâu troăng pơkâ pêi, troăng prôk dêi Đảng, troăng hơlâ, luât dêi Tơnêi têa troh mâu râ kuăn pơlê. Nâ hbrâ tơrŭm ƀă krâ pơlê, ngế ki kuăn pơlê loi tơngah, mâu bok xối yah chĭng mơhnhôk kuăn pơlê veăng tơlo lối 3.370 hâi pêi cheăng, pleăng vâ  chê 5.000 met karê tơnêi vâ pro troăng kân thôn pơlê. Mât trân Tơnêi têa Việt Nam cheăm xuân hiăng mơhnhôk mơjiâng châ 10 toăng hngêi Tơrŭm môi tuăn kum mâu rơpŏng pá puât.

Ing châ tơ-brê tung tơdroăng mơhnhôk kuăn pơlê, mơhno hnoăng dêi ngế kơdrâi tung rơpŏng ƀă pơlê pơla, nâ Cil Pam K’Quyên tối ăm ‘nâi:

“Bă hdroâng kuăn ngo tiô kơjôi nôu môi tiah ngin, mê á xuân mâu nâ o vâi kơdrâi a thôn, a cheăm pói vâ veăng tơlo ivá kŭn dêi tơná ăm pơlê pơla, ăm xah hô̆i. La ki kal má môi cho pêi lĕm hnoăng cheăng mơngế kơdrâi tung rơpŏng, klêi mê pêi lĕm tro tơdroăng cheăng pơlê pơla… Xua bu ai tiah mê ngin nếo troh lâp lu tơdroăng mơ-eăm tơkâ hluâ pá puât ăm kuăn pơlê tung pơlê, ki rơhêng vâ tối cho vâi kơdrâi veăng mơnhông cheăng kâ rơpŏng hngêi, ing mê kum tung tơdroăng mơnhông cheăng kâ tơdjuôm dêi pơlê’’.

Kong pơlê Lâm Đồng nôkố ai lối 500.000 ngế vâi kơdrâi tơrŭm cheăng. 5 hơnăm hiăng hluâ, mâu râ hiăng tŏng gum 5.000 rơpŏng vâi kơdrâi hluăn ing kơtiê, tŏng gum mơjiâng nếo 17 khu tơrŭm cheăng xua vâi kơdrâi pơkuâ. Lối 1.200 kế tơmeăm, tơdroăng cheăng dêi vâi kơdrâi châ pêi pro; pêi pro châ tơbrê Tơdroăng tơkêa bro 8 ai hrĭng troăng pêi mơdêk tơdâng tơ’mô ƀă mơdêk tíu pêi cheăng vâi kơdrâi kơpong kuăn pơlê hdroâng kuăn ngo.

Jâ Cil Bri, Phŏ Kăn pơkuâ Khu pơkuâ hdroâng mơngế ƀă Loi tĭng tiô khôp kong pơlê Lâm Đồng tối ăm ‘nâi, kơxô̆ vâi kơdrâi veăng tung râ kăn pơkuâ hnê ngăn cheăng Đảng hneăng hiăng hluâ châ 13,5%; vâi kơdrâi kăn teăng mâ Hô̆i đong kuăn pơlê kong pơlê châ vâ chê 28%; hên vâi nâ o pro kăn pơkuâ mâu khu cheăng, kơvâ cheăng. Tơdroăng ki mê mơhno ivá, ki khên tơnôu ƀă tíu pêi cheăng rế hía rế châ mơnhên dêi vâi kơdrâi Lâm Đồng.

“Tung pơla kố nah, a kơpong kuăn pơlê hdroâng kuăn ngo dêi kong pơlê Lâm Đồng ai tơdroăng ki pơhlêh nhên tung tơdroăng rêh ối, kum hên tung mơnhông cheăng kâ - rêh ối pơlê pơla, rak tơdroăng tơniăn lĕm tung rơpŏng ƀă tơniăn gâk kring a tíu pêi cheăng cho kơnôm môi iâ tơdroăng veăng gum kân dêi mâu nâ  o, vâi kơdrâi, tung mê ai tơdroăng ki veăng dêi mâu vâi kơdrâi đảng viên hdroâng kuăn ngo kơpong hơngế hơngo. Mâu nâ o, vâi kơdrâi kố đi đo djâ troăng ahdrối  tung mơjiâng hơniâp lĕm rơpŏng, kêi đeăng tơdroăng cheăng pơlê pơla… Mơhé mâu nâ o ôh tá xê drêng lâi xuân trâm tơ’lêi hlâu tung tơdroăng pêi cheăng pơlê pơla, laga tâi tâng mâu tơdroăng ki klâi mâu nâ o vâi kơdrâi hdroâng kuăn ngo hiăng veăng gum ăm pơlê Lâm Đồng cho tơxâng khât ‘nâng’’.