VOV4.Xơ Đăng - Kơxo lơ 7/2, cho hâi má 7 Têt, kăn ƀô̆, viên chưk, mâu ngế pêi cheăng a mâu kơ koan tơnêi têa a Dak Lak pơxiâm mot tung hâi pêi cheăng ki apoăng dêi hơnăm nếo Nhâm Dần 2022. A Tíu xiâm chêh pro hlá mơ-éa tơdjuôm kong pơlê Dak Lak, tung rôh pêi cheăng apoăng hơnăm, mâu kăn ƀô̆ Ƀơrô kăn sat chêh pro hlá mơ-éa ƀă tơniăn pơlê, Kŏng an kong pơlê hiăng rĕng tơdah xo hồ sơ dêi kuăn pơlê troh pro theh căn cước.

Mâu ngế pêi cheăng troh a Tíu xiâm tơbleăng tơdroăng cheăng pêi kong pơlê Dak Lak hâi apoăng klêi rôh pơtê Têt Lo hơnăm nếo Nhâm Dần

A Tíu xiâm tơbleăng tơdroăng cheăng kong pơlê Dak Lak, hâi pêi cheăng ki apoăng klêi kơ’nâi Têt Lo hơnăm nếo, kơxô̆ ngế troh tăng ‘nâi tơdroăng hên tâk péa hdroh tâng vâ pơchông ƀă hâi tiah hmâ. Ƀă hiâm mơno pôu râng tơdroăng cheăng sap ing hâi pêi cheăng ki apoăng hơnăm nếo, mâu kơ koan tíu pêi cheăng dêi kong pơlê Dak Lak dế pơtối hơ’lêh nếo mơdêk tơdroăng cheăng tơƀrê, mơ-eăm pêi klêi, ƀlêi tơniăn tâi tâng hnoăng cheăng a hơnăm 2022.

Katarina Nga tơplôu ƀă tơbleăng