VOV4.Xơ Đăng - Hâi kố, lơ 16/2 ai 2.656 ngế rơtăm dêi kong pơlê Gia Lai kô lo lăm pro mô đô̆i ƀă Kŏng an kuăn pơlê. Troh nôkố, mâu kuăn pơlê hiăng ai mâ a tíu pơkâ vâ tơkŭm test rĕng COVID-19 ƀă tôe xo têa môh khăm ƀă RT – PCR. Kơxô̆ kuăn pơlê kong têa kố kô châ pơcháu ăm mâu đông: Kuân đoân 3, Kuân khu 5, Kŏng an kong pơlê, Khu xiâm pơkuâ hnê mơhno Mô đô̆i gâk tơkăng kong kong pơlê ƀă Khu xiâm pơkuâ mô đô̆i kong pơlê. Tiô xêo, kơxô̆ liăn pơlê lo lăm pro mô đô̆i hơnăm kố hriâm râ má péa, râ má pái châ vâ chê 80%; hriâm trung câ̆p, cao đẳng, đăi hok châ lối 1,4%; đoân viên châ lối 76%; ai 22 ngế cho đảng viên.

Hơnăm kố, tung kơxô̆ 2.250 ngế rơtăm lo lăm pro mô đô̆i ai troh 61% cho mơngế hdroâng kuăn ngo. Vâ mâu rơtăm hmiân tuăn lo lăm pro mô đô̆i, mâu kong pơlê hiăng tơkŭm po lăm kơ-êng, mơhnhôk, tơkŭm pêi pro tơtro troăng hơlâ tŏng kum parŏng – mô đô̆i.

-Hơnăm 2022, kong pơlê Lâm Đồng châ pơcháu ăm rah xo 1.150 ngế vâi rơtăm ki tro hơnăm pro mố đô̆i. Tơdroăng rah xo, lăm pro mố đô̆i ai tiô pơkâ mơjiâng Khu lêng tung tơdroăng nôkố, vâ ai kăn ƀô̆ a kong pơlê tơring cheăm kơpong hngế hngo. Vâ ai tơ-brê tơdroăng rah xo lăm pro mố đô̆i  hơnăm 2022, khu pơkuâ ngăn lêng rêm râ tí tăng ‘nâi plĕng ăm Vi ƀan rêm râ tơkŭm chên inâi a tơrêm cheăm, bêng pơlê kân, mâu hngêi trung râ má pái, tíu xiâm hnê cheăng pêi tung kong pơlê ăm tâi tâng mâu vâi rơtăm ki hiăng châ 17 hơnăm.Tơdroăng rah lăm pro mố đô̆i pêi tro tŭm kơxô̆ mơngế tơniăn môi tuăn tơdâng tơ’nôm, tơbleăng ăm rêm ngế ‘nâi, kơdĭng, mơdêk hnoăng cheăng dêi rêm ngế, khu tơrŭm vâ mơdêk tơ-ƀrê tơdroăng rah lăm pro mố đô̆i.

-Tiô pơkâ, 170 vâi rơtăm châ rah xo pro mô đô̆i dêi pơlê kong kơdrâm Kon Tum, kong pơlê Kon Tum châ hbrâ tíu kâ, ối pơtê, pêi cheăng a Tíu xiâm hnê cheăng lêng, sap hâi lơ 11/2 troh hâi pơcháu tơdah mô đô̆i hơnăm 2022. Tung pơla kố, mâu kuăn pơlê châ rah xo pro mô đô̆i châ veăng hriâm hneăng pá kong môi tiah pơtâp ivá a kơxo má, 16 tơdroăng tơchok pơtâp ivá kơxo má, tơdroăng pơkâ tung khu lêng, hnê mơhno hdôu pơkhom hmân ếo, hriâm hơdruê mâu tơdroăng hơdruê ƀă pôe xâk tiô pơkâ tung khu lêng; tơdrêng amê, tơkŭm po mâu tơdroăng xah hêi, xah mâu tơdroăng vâ pro phiu ro ăm droh rơtăm ahdrối vâ lăm pro mô đô̆i.

Ƀă tơdroăng ki mơ-eăm, khŏm mơ-eăm dêi khu râ kăn pơkuâ hnê ngăn cheăng Đảng, khu râ kăn pơkuâ ƀă Hô̆i đong pơkuâ mô đô̆i pơlê kong kơdrâm Kon Tum tung tơdroăng pơkuâ, klâ kơtăn tơkŭm kuăn pơlê ahdrối vâ lăm pro mô đô̆i, kô kum vâ kong pơlê Kon Tum kêi đeăng tơtro tơdroăng rah xo mô đô̆i hơnăm 2022.

Gương -A Sa Ly tơplôu ƀă tơbleăng