Kố cho hơnăm ki apoăng kơvâ hnê hriâm pơxiâm mot tung hơnăm nếo klêi kong pơlê Dak Lak tơ’mot tơdjuôm ƀă Phú Yên. Tơdroăng tơpui tâi kơvâ cheăng rah xo cho: “Rak tro luât - Hriăn plĕng ki nếo – Tơƀrê - Mơnhông tơtêk”. Klêi tơ’mot, tơdroăng hnê hriâm dêi kong pơlê Dak Lak châ po rơdâ ƀă lối 1.370 toăng  hngêi trung hnê sap mầm non troh râ má pái phôh thong, hngêi trung hnê cheăng pêi ƀă hngêi trung yăo yuk thường xuyên. Lâp tung kong pơlê nôkố ai lối 700.000 ngế hok tro, hok viên rơtế ƀă mâu ngế pêi cheăng tung hngêi trung ai lối 38.400 ngế kăn ƀô̆ rak ngăn, thái cô, ai tiô tơdroăng kal vâ mơnhông hnê hriâm.

Ki xiâm tung hơnăm hriâm kố, kong pơlê Dak Lak mơ-eăm mơdêk kơxô̆ hngêi trung châ mơnhên tối râ tơnêi têa tâk troh 55% rak kơxô̆ hok tro plah tơ’noăng mơgêi hriâm râ má pái phôh thong kơpêng 98% ƀă pơtối achê ki kơtăn hơngế tung tơdroăng hnê hriâm tơƀrê pơla kơpong tơ’lêi hlâu ƀă kơpong xơpá, vâ troh tơdroăng mơnhông tơdâng tơ’mô ƀă krá tơniăn ton ăm tâi kơvâ hriâm.

-A Gia Lai, lối 760.300 ngế  hok tro a 1.200 hngêi trung veăng Leh pơxiâm po hơnăm hriâm 2025 – 2026. Kong prâi rơngiâp lĕm, ôh tá ai mêi hiăng pro tơdroăng chiâng ro ăm hâi tâi tâng kuăn pơlê chiên vâi hdrêng troh hngêi trung. Hơnăm hriâm kố, kong pơlê Gia Lai ai 760.306 ngế hok tro a 23.017 lâm ƀă tâi tâng 37.347 kăn ƀô̆, thái cô, nhân viên.

Laga, kơvâ hnê hriâm xuân tá hâi tŭm lối 3.500 ngế tâng pơchông ƀă tơdroăng pơkâ, tơdrêng amê kế tơmeăm khoăng a hên tíu, ki má lối cho kơpong tơkăng kong, tá hâi ai tŭm hên. A ngiâ, kơvâ hnê hriâm kô tơbleăng Vi ƀan kong pơlê Gia Lai rah tơ’nôm 1.428 ngế thái cô, tơdrêng amê rah xo, pơhlêh tíu hnê tơtro vâ tơxâng pơkâ hnê hriâm, ki má lối cho ƀă mâu môn hriâm nếo tiô Tơdroăng hnê hriâm phôh thong 2018. Kố cho troăng hbrâ ki kal vâ tơniăn ki dâi lĕm hnê ƀă hriâm tung hơnăm hriâm nếo.