Mô đô̆i gâk tơkăng kong dêi kong pơlê Dak Lak ƀă Hngêi trung phôh thong ai tíu kâ koi ối pơtê râ má môi - râ má péa Ia Lốp kô tơrŭm tung 5 khu hnoăng cheăng, tung mê, Mô đô̆i gâk tơkăng kong mơnhông hnoăng cheăng rơtế ƀă hngêi trung tung hnê hriâm luât, túa rêh ối, hnê cheăng pêi, tơkŭm po tơdroăng ƀă rak ngăn hok tro ai tơdroăng rêh ối pá puât.

Ki rơhêng vâ tối, mâu tơdroăng tŏng kum hok tro pơtối châ rak vế, tung mê, ai "Kum o troh hngêi trung - Kuăn roăng đông Mố đô̆i gâk tơkăng kong", xo păn roăng hok tro kơtiê, diâp hnoăng liăn hriâm rơkê, tŏng kum khăm pơlât, hbru pơkeăng ƀă kế tơmeăm, tơmeăm xúa tung hriâm tâp ăm hok tro hdroâng kuăn ngo ai tơdroăng rêh ối pá puât. Đăi tă Rơ Lan Ngân, Kăn phŏ pơkuâ ngăn Đảng Khu pơkuâ ngăn Mố đô̆i gâk tơkăng kong kong pơlê Dak Lak tối ăm 'nâi, tơdroăng pro nhŏng o pro tơ'nôm troăng hơlâ vâ khu Mố đô̆i gâk tơkăng kong tơrŭm cheăng đi đo, krá tơniăn ƀă hngêi trung tung hnê hriâm ƀă rak ngăn hok tro kơpong tơkăng kong.

Ing mê, veăng kum mơdêk ki rơkê plĕng hnê hriâm, hnê hriâm 'na luât, hnoăng cheăng gâk kring hnoăng pơkuâ tơkăng kong ƀă mơjiâng pơlê cheăm kơpong tơkăng kong krá rơdêi.