VOV4.Xơ Đăng - Rơtế ƀă lâp tơnêi têa, kăn ƀô̆, mô đô̆i gak tơkăng kong dêi kong pơlê Dak Nông xuân dế thâ hbrâ môi rơnó hơngui nếo. Laga phiu ro rơnó hơngui ôh tá piu lôi hnoăng cheăng, mâu mô đô̆i a tơkăng kong xuân đi đo mơ-eăm, kơchăng vâ gak kring tơdroăng ki tơniăn lĕm a tơkăng kong.

Tơdroăng ki koh tơdah Têt Nhâm Dần 2022 dế hơniâp ro a troăng tíu tơkăng kong dêi kong pơlê Dak Nông, mơngiơk rơnó Hơngui dế hiăng troh lâp lu mâu đông tíu tơkăng kong. Ƀă mâu lêng, đông cho hngêi, tíu tơkăng kong cho pơlê pơla, kâ Têt a đông xuân môi tiah kâ Têt a hngêi, ai kơ-ƀăn tơxông, ai kế tơmeăm tŭm têk, ai reăng đào, reăng mai ƀă tơdroăng ki hơniâp ro tung hơnăm nếo.

Hơnăm ki apoăng koh tơdah Têt a tíu tơkăng kong, binh nhất Lầu Văn Hiện, Kăn pơkuâ ngăn lêng, Đông gak tơkăng kong Dak Tiên, ối tung Khu ngăn ‘na mô đô̆i gak tơkăng kong dêi kong pơlê Dak Nông tối ăm ‘nâi, tơdroăng ki tŏng kum, hnê mơhnhôk dêi khu kăn pơkuâ, khu râ cheăng rơtế ƀă tơdroăng ki hiăng hbrâ rơnáu nhên dêi đông vâ kô ai môi roh ki koh tơdah Têt hơniâp ro, phâi tơtô hiăng kum ăm mâu ngế lêng môi tiah ngoh chía kơdroh iâ tơdroăng ki chôu vế, khíu pâ dêi hngêi ƀă xuân hlê nhên hnoăng cheăng, tơdroăng pôu râng tơdroăng cheăng dêi tơná a kơpong tơnêi tíu tơkăng kong tơnêi têa.

“Hơnăm kố, cho hơnăm ki apoăng á ối tơdah Têt a tíu tơkăng kong. Nhŏng o tung đông xuân môi tiah mâu nhŏng o tung hngêi, ngăn dêi rơpó môi tiah môi klêa môi kliâm. Á tâ phiu ro ‘nâng, hâk tơngăm á cho ngế lêng. Hơnăm nếo ai rơkong rơkâu pơtroh rơpŏng hngêi, pú hmâ, mơngế tung hngêi rơpŏng cho môi hơnăm nếo ai ivá mo dâi lĕm ƀă tơniăn, kro mơdrŏng”.

Kăn ƀô̆ lêng đông gak tíu tơkăng kong Dak Tiên, Khu pơkuâ hnê ngăn mô đô̆i gak tơkăng kong dêi kong pơlê Dak Nông lăm pơtrui, séa ngăn, kring vế troăng tíu tơkăng kong a rơnó Têt

Ing kơpeăng kŏng ki rơkê dêi mâu kăn ƀô̆, mâu lêng gak tơkăng kong, mâu kơ-ƀăn tơxông ki hiăng châ pro lĕm tro túa vâ kum ăm i kâ tung mâu hâi Têt. Kế tơmeăm ki ê cho xua ing tơná ki mơ’no dêi xêh, xua hiăng ai hlâu ing kơdrum hngêi, mâu kơchâi ki mê đi đo kruá lĕm, kô bê vâ kâ tung mâu hâi pơla Têt kố ah.

Thiê̆u tă Lương Văn Phú, Kăn phŏ ngăn kơvâ cheăng kal kí dêi đông Dak Tiên, ối tung Khu pơkuâ ngăn mô đô̆i gak tíu tơkăng kong dêi kong pơlê Dak Nông tối ăm ‘nâi, khu kố hiăng pêi pro lĕm tro hnoăng cheăng ki hnê mơhno tuăn ngôa ƀă mâu kăn ƀô̆, mâu lêng pơrá tơniăn tuăn koh hâk ro rơnó Hơngui, tơdah Têt:

“Ƀă hiâm mơno dêi mâu ngế lêng dế nôkố pơrá hơniâp ro, sôk suâ, ƀă hiăng hbrâ rơnáu mâu kế tơmeăm vâ rak tơniăn koh tơdat Têt. Mâu vâi pú hiăng mơnhên, hnê tối khât ‘na hiâm mơno vâ rak vế, pêi pro tiô kơ hnoăng cheăng hiăng pơcháu”.

Xuân môi tiah mâu roh Têt hơnăm ki ê, Têt Nhâm Dần 2022 kố dêi Khu pơkuâ ngăn mô đô̆i gak tơkăng kong dêi kong pơlê Dak Nông, pakĭng hmê kơchâi kâ dêi khu lêng, mê cho pháu hơnêa ki vâ gak ngăn plâ hâi plâ măng. Mâu mô đô̆i gak tơkăng kong rế koh tơdah Têt, rế hơniâp ro rơnó hơngui, rế tơmâng ngăn vâ ‘nâi nhên ai mâu tơdroăng ki ôh tá tơniăn dêi tíu tơkăng kong, vâ hbrâ pêi pro dêi hnoăng cheăng tơná.

Rế vâ chê Têt mê tơdroăng cheăng lăm pơtrui, lăm seá ngăn dêi mâu đông gak tíu tơkăng kong xuân châ hbrâ rơnáu vâ pêi hnoăng cheăng. Tơdroăng lăm pơtrui, séa ngăn mơngế, rơxế mot lo a kơpong tíu tơkăng kong hiăng châ pêi pro lĕm tro, vâ thăm mơdêk hnoăng pơkuâ ngăn, hbrâ, mơdât pơreăng COVID-19 châ tơ-ƀrê.

Trung tá Nguyễn Huy Hiếu, Đông gak tơkăng kong dêi Dak Tiên, Khu ngăn mô đô̆i gak tơkăng kong dêi kong pơlê Dak Nông tối ăm ‘nâi:

“Kơnôm châ Đảng, Tơnêi têa, kuăn pơlê pơcháu hnoăng cheăng tung pơkuâ, kring vế, gak ngăn tíu tơkăng kong, pâ tơhrâ kô pêi pro tro hnoăng cheăng, tơkŭm rak ngăn, pơkuâ tơniăn tíu tơkăng kong, tơnêi tíu, châ ‘nâi nhên tơdroăng, tơrŭm ƀă mâu khu râ, kơvâ cheăng lêng vâ tơplâ châ tơ-ƀrê ƀă mâu ngế pro xôi, kơdo mơ-eăm pêi pro klêi hnoăng cheăng tung rơnó Têt”.

Tơrŭm cheăng pơla mâu khu râ a tíu tơkăng kong Dak Nông kring vế troăng tokăng kong

Kong pơlê Dak Nông ai troăng tíu tơkăng kong xŏn dâng 141 km tơkâ luâ 7 to cheăm tíu tơkăng pơrá hiăng ai mâu tôh ki pơkuâ rak ngăn troăng tíu tơkăng kong, tơneăn hdró tơkăng kong. Mâu hơnăm hdrối mê hía nah, maluâ cho tung mâu rơnó Têt, tơdroăng tơrŭm cheăng dêi khu mô đô̆i gak tơkăng kong ƀă khu pơkuâ ngăn pơlê cheăm, mâu lêng kuăn pơlê dêi cheăm hiăng pêi pro châ tơ-ƀrê khât tung tơdroăng lăm pơtrui, séa ngăn, hbrâ mơdât kuăn mơngế luâ tíu tơkăng kong, lơ ing mâu kong têa ê mot, tơplâ mơdât châ tơ-ƀrê tơdroăng ki ai pro xôi a tíu tơkăng kong.

Đăi tă Nguyễn Văn Lư, Kăn pơkuâ ngăn mô đô̆i gak ngăn tíu tơkăng kong dêi kong pơlê Dak Nông tối ăm ‘nâi, tơdrêng ƀă tơdroăng mơjiâng hiâm mơno veăng gak ngăn dêi kuăn pơlê, mê khu mô đô̆i gak ngăn tíu tơkăng kong xuân hiăng pêi tro tơdroăng ki tơrŭm tơpui kâ ‘na tơkăng kong. Ki rơhêng vâ tối, tung pơla ai pơreăng COVID-19 xông tâ tú ó tiah nôkố, tơdroăng cheăng gak ngăn tíu tơkăng kong xuân hiăng châ pêi pro tro tiô tơdroăng, châ tơ-ƀrê.

Ing mê, veăng kum kring vế, rak ngăn ‘na tơrŭm cheăng pơla peá pâ tơnêi têa, gak ngăn troăng tíu tơkăng kong dêi Tơnêi têa:

“Tung pơla péa pâ dế ai hên pơreăng tâ tú mê ngin hiăng hơ’lêh tơdroăng cheăng, túa tơrŭm cheăng ki nếo, ôh tá chiâng châ trâm a ngiâ mê ngin chêh kơthô tơpui tơno, ing phôn ƀă kô trâm, tơpui tơno a troăng tíu tơkăng kong. Xuân chiâng vâ tối, ƀă tơdroăng cheăng, hơ’lêh túa cheăng mê ngin xuân ối pơtối ‘na tơdroăng tối pơtâng, tơno tơnêng ‘na mâu tơdroăng ƀă hnối tơrŭm tung cheăng pơkuâ ngăn, kring vế tơnêi têa, pơkuâ ngăn kơpong ƀă kring vế tơniăn a kơpong tíu tơkăng kong dêi rêm pâ”.

Tơdroăng ki kơhnâ mơ-eăm, rơnáu mâu hnoăng cheăng dêi khu mô đô̆i gak tíu tơkăng kong a Dak Nông hiăng ƀă dế veăng kum kal kân khât tung kring vế tơniăn ăm pơlê pơla a kơpong tíu tơkăng kong dêi kong pơlê. Malối, tung pơla Têt kố, tơdroăng ki rak vế tơniăn dêi mâu vâi ngoh dế kum ăm tơdroăng tơniăn vâ kuăn pơlê phiu ro, sôk suâ koh tơdah Têt.

Công Bắc chêh

Nhat Lisa tơplôu ƀă tơbleăng