Phá tâ mâu tơdroăng sôk ro rêm hơnăm, kơpong hmâ pêt reăng Bình Kiến peăng Mâ hâi lo kong pơlê Dak Lak tung mâu hâi ki kố rơhĭng tâ klêi kơ’nâi tro tơdjâk xua khía mơhot kân 13 plong mot ƀă têa lân lu a tơdế khế 11/2025. Laga, lâp lu a ƀăng klâng reăng, kuăn pơlê xuân dế tơxup pêi, ngăn dêi kơdrum. Mâu kơdrum reăng cúc ki tro kơtong nah hiăng châ tóu ƀă mâu loăng pơlái, mâu tíu ki phuâng xua reăng hlâ châ mơgrúa lĕm vâ tơkŭm ‘măn mâu kơ’lo reăng ki u ối. Kố cho rôh ki pơkâ vâ châ tê reăng a kơchơ a rôh Têt Lo hơnăm nếo Bính Ngọ 2026.

Xơpá kân má môi dêi kuăn pơlê drêng cho liăn pêi cheăng. Klêi kơ’nâi têa lân lu, kơxô̆ liăn ‘no vâ rôe phon, pơkeăng xôh kơdê ôa hdrong ƀă liăn mơhá hnoăng mơngế pêi xuân tâk hên, thăm pro pá ăm kuăn pơlê drêng liăn vâ pêi cheăng hiăng ‘no tâi rôh pêi a poăng rơnó nah. Jâ Nguyễn Thị Liên, bêng Bình Kiến tối:

“Á ‘mâi rơnêu dêi ing apoăng, á pêi ngăn dêi nếo, rơvât phon xôh pơkeăng nếo, hnoăng mơhá mơngế pêi cheăng tâi liăn hên. Tơngah troh rơnó kô châ tê vâ châ xo dêi liăn ki ‘no hên apoăng”.

A mâu ngế ki pêi kơdrum, tơdroăng rak ngăn dế chôa lâng mot tung mâu hơnăm ki kal má môi: tôm pơpŏm reăng hlối pôe tơkâng vâ ‘mâi hơ’lêh hâi reăng vâ tơpo. Xua tơdroăng cheăng pêi hên ƀă kal thế pêi tro kih thuât, mâu rơpŏng kuăn pơlê thế tăng tơ’môm mâu ngế pêi cheăng, pro kơxô̆ liăn ‘no mơhá mơngế pêi cheăng thăm hên ƀă pro yă tê chiâng to kơnâ. Jâ Huỳnh Thị Nho tối:

“Pơla kố cho pơla ‘mâi rơnêu văng ngăn dêi reăng, tôh têa rơvât phon ăm reăng i lĕm. Klêi rôh têa lân lu mê rak ngăn pá tâ, khía plong pro tơ’nhiê hên, hnoăng mơhá ăm mơngế pêi văng toh têa xuân hên há. Pêt reăng ôh ti xê to púi vâ châ tê, tah iâ ki xơpá”.

Tiô riân ngăn hâi teăm tŭm, bêng Bình Kiến ai kơpêng 50 ha deăng pêt reăng cúc ƀă mâu túa reăng. Nôkố, dâng 50% kơxô̆ reăng a mâu kơdrum iâ tro tơdjâk hiăng châ mâu khu ki lăm rôe chêh inâi hdrối vâ rôe. Ƀă mâu deăng ki u ối, kuăn pơlê xuân ối rak ngăn vâ ‘nâi yă tê ƀă tơdroăng tê mơdró. Jâ Nguyễn Thị Hiển, ăm ‘nâi:

“Mơngế ki rôe xuân tơbleăng rôe, kơ-êng yă rêm hâi. Nôkố reăng hiăng vâ kân hiăng vâ ai, dế tơkôm lo pơpŏm ‘nôi mê vâi nếo pơkâ vâ rôe”.

Vâ rơtế ƀă kuăn pơlê, mâu kăn kong pơlê hiăng hbrâ mơjiâng mâu troăng hơlâ tơdjêp ƀă kơchơ mơdró, kum tê vâ kơdroh ki ôh tá mơhúa ăm mâu kuăn pơlê klêi kơ’nâi môi hơnăm  kong prâi pro ôh tá tơniăn. Pôa Lương Thảo Nguyên, Phŏ kăn hnê ngăn  Vi ƀan bêng Bình Kiến, kong pơlê Dak Lak, ăm ‘nâi kong pơlê dế tơrŭm krá vâ tăng tíu ki rôe tơniăn, kum kuăn pơlê hmiân tuăn tăng mơngế vâ rôe reăng drêng hiăng vâ troh Têt.

“Vi ƀan bêng ai pơkâ tơkŭm po tê reăng rơnó Têt a troăng kân 1/4, mơhno mâu tíu tê reăng, tơkŭm ƀă rơnuâ pro mâu loăng reăng ăm lĕm mơnâ mâ pro tơdroăng tê rôe ăm kuăn pơlê ki rơhêng vâ rôe reăng tơ’lêi hlâu tung rôh Têt”.

Mơhé trâm hên tơdroăng ôh tá tơniăn ‘na kong prâi ƀă kơxô̆ liăn ‘no pêi, la ƀă tuăn mơ-eăm pêi cheăng kơhnâ khât tơkâ luâ xơpá, mơngế ki pêt reăng Bình Kiến dế mơ-eăm pêi cheăng tâi ivá tơná vâ ronó Têt hơnăm kố ai reăng tê ăm mơngế vâ rôe.