VOV4.Xơ Đăng - Hâi lơ 4/3, a pơlê kong kơdrâm Phú Quốc, kong pơlê Kiên Giang, Khu xiâm tơpui kâ Việt Nam tơkŭm po hneăng hôp mơgêi 20 hơnăm tơdroăng pêi cheăng hdró tâp tơneăn tơkăng kong a tơnêi tơníu Việt Nam – Kul vâ mơgêi, mơnhên mâu tơdroăng châ tơƀrê tơpui tơno hiăng châ tơƀrê. Hneăng hôp xua pôa Bùi Thanh Sơn, Ngế xiâm tơpui kâ, teăng mâ khu râ kăn mâu Khu xiâm ƀă khu râ kăn pơkuâ 10 kong pơlê ai troăng tơkăng kong ƀă kong têa Kul veăng hôp.

Mơgêi 20 hơnăm pêi cheăng hdró tâp tơneăn tơkăng kong tơnêi tơníu Việt Nam – Kul 

Pôa Phạm Bình Minh, Kăn cheăng tung Khu xiâm kal kí, Ngế pro xiâm phŏ hnê mơhno má môi veăng ƀă hnê mơhno hneăng hôp. Xông tơpui a hneăng hôp, pôa Phạm Bình Minh hnê mơhno Khu xiâm tơpui kâ ƀă mâu Khu xiâm kong pơlê ki tơdjâk pêi pro tro tơdroăng pơkuâ tơkăng kong, gak kring krá tơniăn troăng tơkăng kong, tơneăn tiô mâu mơ-éa luât hiăng kĭ, vâ kum thăm mơnhông mơdêk cheăng kâ  - rêh ối pơlê pơla ƀă tơniăn cheăng lêng gak kring mơjiâng kơpong tơkăng kong pơla péa tơnêi têa chiâng kơpong hơniâp lĕm tơniăn ƀă mơnhông mơdêk krá tơniăn.