Kơxo hâi lơ 8/10, a tíu pêi cheăng xiâm Đảng, Klêi kơnâi lối 2 hâi pêi cheăng ƀă tơdroăng pêi rĕng, kơtăng, môi tuăn kuăn pơlê, ai hnoăng pêi khât, Hôp rôh má 13 Khu kăn xiâm pơkuâ hnê ngăn Đảng hneăng 13 hiăng mgêi roh hôp. Tơbleăng a rôh mơgêi, pôa Tô Lâm - Kăn xiâm pơkuâ hnê ngăn Đảng tối nhên, Hôp rôh má 13 Khu kăn xiâm Đảng hneăng 13 hiăng pê klêi tâi tâng tơdroăng pơkâ.

A rôh hôp tơ rêm tơdroăng châ hbrâ nhên, tơpui nhên, pâ thế ƀă môi tuăn khât, tung mê, ai hên tơdroăng kal tơdjâk troh tơdrêng troh ki châ tơƀrê dêi hneăng hôp mâu kăn tung lâp tơnêi têa rôh má 14 dêi Đảng, troh pơkâ mơnhông rĕng, krá tơniăn, troh mơnhông rêh ối dêi kuăn pơlê.

Hôp rôh kố tơpui tơno tối tơdrăng, khoa hok ƀă môi tuăn hên troăng hơlâ, pơkâ ki kal. Tung mê, Khu kăn xiâm tơbleăng mâu  tơdroăng ki chêh pơtroh ăm hneăng  hôp má 14 dêi Đảng; môi tuăn vâ tơbleăng inâi mâu ngế pêi cheăng tung Tíu xiâm ƀă Vi ƀan Séa ngăn Tíu xiâm tơnêi têa hneăng má 14; ăm hnê tối ‘na hâi chôu, tơdroăng ki kal, tơdroăng pêi  pro, luât pơkâ pêi cheăng, luât pơkâ tâ phĭu rah xo dêi hneăng hôp Đảng tung lâp tơnêi têa rôh má 14 ƀă troăng hơlâ tơniăn tro tiô luât pơ’lêh nếo tro khoa hok, ai pơxúa, tơbrê.