Xông tơpui mơgêi hneăng hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, pơtối mâu troăng hơlâ pêi pro sap ing apoăng hneăng, Hneăng hôp roh kố pêi nhên Pơkâ Hneăng hôp má XIV dêi Đảng, rơtế mơjiâng Đảng ƀă tơdroăng pơkuâ tơnêi têa hlối mơnhông tơnêi têa. Tíu xiâm tơnêi têa hiăng môi tuăn troăng hơlâ hriăn plĕng mâu tơdroăng xiâm dêi Đảng ƀă troăng mơnhông ton xŏn dêi tơnêi têa.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa ăm 'nâi, Tíu xiâm tơnêi têa hiăng pơkâ mâu troăng hơlâ ki nếo 'na mơdêk ivá pơhlêh nếo, pơhlêh xêh ‘na ‘mâi mơnhông dêi Đảng ƀă khu cheăng kal kí. Tíu xiâm tơbleăng Pơkâ 'na mơhnhôk ‘mâi rơnêu Đảng ƀă khu cheăng kal kí krúa lĕm, krá rơdêi, tŭm têk, tơxâng pơkâ mơnhông dêi tơnêi têa tung rơxông nếo.

Tíu xiâm hiăng pơkâ hơ'lêh nếo tơdroăng cheăng kăn ƀô̆ ƀă troăng hơlâ mơhnhôk tơ’mot, xúa mơngế rơkê, hbrâ mơngế pêi cheăng tơxâng pơkâ mơnhông tơnêi têa. Klêi kơ'nâi Hneăng hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ pêi nhên tŭm, teăm tơdrêng mâu troăng hơlâ, pê klêi má môi hnoăng cheăng hơnăm 2026, pro xiâm vâ pêi cheăng hơnăm 2027 mơdêk rĕng, châ tơƀrê; kơnâ séa ngăn, tí tăng ngăn tơdroăng pêi pro ƀă mơnhông hnoăng pêi pro dêi kuăn pơlê.