VOV4.Xơ Đăng - Kơxo lơ 27/1, a tíu mơjiâng pro tơdroăng tơkêa bro troăng kân ăm phêp rơxế kơtâu têi Peăng kơnhŏng – Peăng Hdroh tơnêi têa kơpong Mai Sơn – Troăng kân lăm ngi kong pơlê ki ê kơxô̆ 45, Khu xiâm pơkuâ troăng prôk ƀă rơxế kơtâu tơkŭm po mơhnhôk tơdroăng tơ’noăng ‘’Hơngui Nhâm Dần a mâu tíu mơjiâng pro troăng kân’’, châ pêi pro troh tâi tâng mâu tíu mơjiâng pro tơmeăm, tơdroăng tơkêa bro ki kal tơnêi têa dêi Khu xiâm pơkuâ troăng prôk ƀă rơxế kơtâu.

Tơdroăng tơkêa bro mơ’no liăn mơjiâng troăng kân ăm phêp rơxế kơtâu têi Peăng Kơnhŏng – Peăng Hdroh tơnêi têa cho tơdroăng tơkêa bro ki xiâm tơnêi têa, châ pêi pro hluâ 2 hneăng. Klêi kơ’nâi kêi đeăng, troăng kân ăm phêp rơxế kơtâu têi kô chiâng troăng kân ki ăm rơxế kơtâu ki kal, tơdjêp mâu kơpong cheăng kâ ki xiâm, kum mơhnhôk mơ’no liăn cheăng ƀă xúa tâi tâng mâu tơmeăm ki mơdêk ƀă ki rơdêi dêi mâu kong pơlê.

Môi hiâm mơno djâ rêm tơmeăm mơjiâng pro kêi đeăng tro tơdroăng pơkâ cho tơdroăng ki pói vâ ƀă khŏm mơ-eăm tơdjuôm dêi mơngế ki pêi pro tơdroăng tơkêa bro kố. Khu pơkuâ tơdroăng tơkêa bro Thăng Long, mâu tíu hnê mơhno séa ngăn ƀă khu ki mơjiâng pro tơkêa pêi pro tơdroăng tơ’noăng ƀă kĭ tơdroăng cheăng vâ mơjiâng pro dêi mâu khu tơdah mơjiâng pro vâ rĕng djâ tơdroăng tơkêa bro tung tơdroăng ki xúa, mơnhông mơdêk châ tơƀrê tơdroăng mơ’no liăn cheăng.

A Sa Ly tơplôu ƀă tơbleăng