Tung pơla kố nah, tơdroăng po rơdâ pêi pro mâu Tơdroăng xiâm tơnêi têa châ tơƀrê hên kal khât, veăng gum tung tơdroăng mơnhông cheăng kâ – rêh ối pơlê pơla dêi tơnêi têa. Tơdroăng xiâm tơnêi têa mơjiâng thôn pơlê nếo, Tơdroăng pơkâ xiâm tơnêi têa kơdroh kơtiê krá tơniăn (hneăng hơnăm 2021 – 2025) hiăng châ ƀă hluâ mâu pơkâ, tơdroăng pơkâ; Tơdroăng pơkâ tơnêi têa mơnhông cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo hneăng má I (2021 – 2025) hiăng pêi kêi đeăng 6/9 khu pơkâ pêi.

Tối mơnhên mâu tơdroăng xiâm dêi 3 tơdroăng pơrá tơdjêp tơdrêng ƀă mơnhông thôn pơlê, tăng cheăng pêi, hngêi trăng troăng klông, mơngế kơtiê ƀă pơhlêh tơdroăng rêh ối kơpong thôn pơlê kơpong kong ngo, mâu rơkong tơpui tối tơdroăng tơmot chiâng môi 3 Tơdroăng xiâm cho tơtro, tơniăn tơdâng tơ’mô tung pơkuâ, tơdjêp châ mơngế cheăng, liăn ngân, mơdêk châ tơƀrê mơ’no liăn cheăng, môi tuăn ‘na túa pơkâ, troăng mơ’no liăn cheăng, troăng hnê mơhno séa ngăn, tơdrêng amê kơdroh pêi pro môi xôh, mơdêk châ tơƀrê xúa kơxô̆ liăn mơ’no liăn cheăng tơnêi têa.

‘Na pơkâ tơdjêp, pôa Nguyễn Hòa Bình, Phŏ Ngế pro xiâm hnê mơhno má môi Chin phuh pơkâ rak tiah mê tâi tâng mâu pơkâ, mơngế cheăng, troăng hơlâ hiăng châ Kuô̆k hô̆i kĭ ƀă tŭm 3 Tơdroăng xiâm, tung pơla ton troh hơnăm 2030; bu rơnêu mâu tơdroăng ki pêi môi hdroh, ƀă Tơdroăng ki nếo ôh tá xê vêh mơjiâng, ôh tá xê vêh kĭ. Kơ koan hnê mơhno 3 tơdroăng cho Chin phuh; Khu xiâm pơkuâ liăn ngân pro xiâm kối tơdjuôm.