Bo cheăng Lâp plâi tơnêi Lệ Thanh 19, tơkoh ƀă kơno tuk Quy Nhơn (235km) ƀă mâu kong pơlê Tây Nguyên, gá tơ’lêi khât ăm chơ tơmeăm. Kơpong cheăng kâ tơkoh ƀă kong pơlê Ratanakiri, kong têa Kul. Bo cheăng lâp plâi tơnêi ối tung pái to kong pơlê mơnhông Việt Nam – Lếo – Kul, ki ai hlâu chiâng tíu xiâm tê mơdró tơkâ luâ tơkăng kong.

Riân troh tâi khế 8/2025, tâi tâng kơxô̆ liăn châ xo ing tê tơmeăm ngi kong têa ê ing Bo cheăng lâp plâi tơnêi Lệ Thanh, châ 155 rơtuh dollars. Tung pơla mê, tê tơmeăm ngi kong têa ê châ 63 rơtuh dollars ƀă mâu tơmeăm ki xiâm môi tiah meăm sắt, thep, phon, hơ’nêh ro ối drêh; cheăng tê tơmeăm ngi kong têa ê, ki hên cho tê priât ối drêh, tâk 59% tâng vâ pơchông ƀă khế kố hơnăm nah. Mâu rơxế to ƀă tơmối prôk lăm tơkâ luâ xuân tâk hên.

Laga, tiô mâu khu mơdró kâ, cheăng tê mơdró ing bo cheăng xuân ối tơvâ pái tơdroăng, mê cho: túa ki vâ prôk tơkâ luâ bo cheăng, mơdrếo kơxô̆ liăn nâp hnoăng mơhá ki kơnâ tâk ối hlo ôh tá tơniăn; kơxô̆ liăn ôh tá păng ‘nâng ƀă nâp hnoăng liăn mơhá kơnâ pro pá kân, malối cho ƀă tơmeăm pêi lo ing chiâk deăng. ‘Na troăng prôk, 5 to hnôu ‘măn nôkố pơrá ối gong pakĭng kơpong bo cheăng, pro pá ăm logistics; troh rơnó gá hên. Hâi khế pêi cheăng ôh tá tơdâng pơla bo cheăng Lệ Thanh (20h00) ƀ ă Oyadav (17h30) ƀă pro vâ chơ tơmeăm.

Pôa Bùi Trần Nhân Trí – Phŏ kăn pơkuâ THILOGI (Kŏng ti Pêi cheăng tiô rơnó Xo pơtroh Lâp plâi tơnêi Trường Hải) tối tơdroăng ki pâ thế:

“Ai môi tơdroăng ki pro hlá mơ-éa maluâ gá kŭn xo, la pro tơdjâk troh tơdroăng cheăng dêi khu mơdró kâ chiâng hrá. Mê cho mơ-éa séa ngăn pơkeăng. Tiô pơkâ, mơnhên séa ngăn pơkeăng mê Kul hbru ăm a Phnom Penh. Tung tơnêi têa mê kal ki xêt má môi. La sap ing Phnom Penh vêh troh a Bo cheăng Lệ Thanh gá ton 2 troh 3 hâi, tung pơla mê, hâi ki lâi xuân ai hlá mơéa. Pâ thế kơ koan séa ngăn pơkeăng môi tuăn hlá mơ-éa ki scan ing troăng điê̆n tưh hdrối, pro hlâu rĕng má môi ăm khu mơdró kâ. Xua ngin tê priât ối drêh  ngi kong têa ê, tâng tơkôm 2 troh 3 hâi mê gá hrá”.

Pôa Phạm Anh Tuấn – Phŏ pơkuâ ngăn Đảng, Kăn hnê ngăn Vi ƀan kong pơlê Gia Lai pơkâ thế: mâu tíu pêi cheăng, mâu kơvâ cheăng rĕng séa ngăn, tŏng gum tơdrêng mâu tơdroăng pâ thế tơdrêng dêi khu mơdró kâ; tơdrêng amê hlối mơdêk rơdêi pơhlêh mâu tơdroăng cheăng pro hlá mơ-éa, pơhlêh nếo tơdroăng pêi cheăng tiô troăng rơtế prôk, tŏng gum. ‘Na ki ton, kong pơlê kô chêh pro pơkâ Bo cheăng; tơdrêng amê hlối pêi cheăng ƀă kong pơlê Ratanakiri, Kul tung khế 10/2025 vâ tŏng gum mâu tơdroăng ki ối tơvâ tơvân.

Kăn hnê ngăn Vi ƀan kong pơlê Gia Lai xuân krếo thế khu mơdró kâ hriăn plĕng kơchơ tê mơdró, po rơdâ troăng prôk ki nếo, malối cho uâ pơliê mâu kế tơmeăm ing kơpong pêt tung tơnêi têa  ƀă Kul vâ tê ngi kong têa ê. Pôa Phạm Anh Tuấn tơhrâ kăn pơkuâ kong pơlê kô rơtế prôk, pro tơ’lêi hlâu mâu tơdroăng, tơmiât troh pơkâ pêi ăm kơxô̆ liăn pêi lo ing tê tơmeăm ngi kong têa ê ƀă roê ‘mot tơmeăm tung kong pơlê dêi Bo cheăng lâp plâi tơnêi Lệ Thanh châ sap ing 2 troh 3 rơtal dollars a hơnăm 2030.

“Peăng khu mơdró kâ, á pơkâ thế pêi pro hlối, chêh inâi pê̆. Bố vâ pro logistics, bố vâ pro cheăng uâ pơliê tơmeăm pêi lo ing chiâk deăng, pơkâ tối kal to há, pro klâi, kơpong pêi cheăng mê gá ối ulâi? Tơdroăng vâ pêi cho gô̆m xo tâi kơpong pêi cheăng a kơpong kố ƀă mâu kong pơlê dêi Kul, tơkŭm troh akố, uâ pơliê trâu rơdâ, klêi mê tê xik tiô troăng kân kơxô̆ 1, troh a kơno têa Phù Mỹ, kơno tuk Quy Nhơn. Pơkâ tâi tâng mâu tơdroăng klâi ki kal, ‘na nâp hnoăng liăn mơhá, ‘na kơxô̆ liăn pêi cheăng. Khu mơdró kâ kô rơtế prôk ƀă kong pơlê tung chêh pro pơkâ, mơjiâng pro kơpong cheăng kâ Bo cheăng lâp plâi tơnêi Lệ Thanh tung hneăng la ngiâ”.

Hneăng hôp Đảng ƀô̆ kong pơlê Gia Lai rôh má I, Hneăng hơnăm 2025-2030 kô po sap ing hâi lơ 2/10 troh lơ 4/10, Đảng ƀô̆ ƀă Kuăn pơlê Gia Lai ƀă ivá khŏm mơ-eăm ăm Gia Lai chiâng kong pơlê chía mơnhông. Hneăng hơnăm 2025-2030 châ mơnhên cho hneăng ki mơnhông tơƀrê rơdêi ƀă tơdroăng pơkâ pêi mơnhông ‘na cheăng kâ lối 10% tung hơnăm.

Pôa Hồ Quốc Dũng, Ngế cheăng Tíu xiâm Đảng, Kăn pơkuâ hnê ngăn Đảng Gia Lai tối tiah kố, vâ pêi châ mâu tơdroăng pơkâ, tơdroăng pơkâ pêi tung hơnăm 2025 – 2030 ăm Gia Lai chiâng môi to kong pơlê chía mơnhông, kong pơlê pơkâ “5 tơdroăng ki xiâm mơnhông, 4 tơdroăng ki tơƀrê”, tung mê, ai tơbleăng pro ‘na ôm hyô logistics kơno tuk tro ƀă troăng prôk ƀă troăng kân xŏn tơdrăng Quy Nhơn – Pleiku, Bo cheăng Lâp plâi tơnêi Lệ Thanh, Kơno tuk Quy Nhơn.

“Má môi cho mơjiâng kơmăi kmok, malối cho kơmăi kơmok uâ pơliê, mơdiê tơmeăm, mơjiâng pro ngăn tung tơdroăng ki ai hlâu, ki pơxúa dêi kong pơlê. Má péa cho mơjiâng pro ôm hyô, tí tăng mâu tơdroăng ki ai hlâu, ki pơxúa dêi kơpong kong ngo, dêi kơpong têa kơxĭ, ki ai hlâu ‘na mâu kế tơmeăm ton nah, túa lĕm tro, kong kế nhâ loăng ƀă kong kế long têa vâ ăm Gia Lai chiâng môi tíu troh ki ro dêi kơpong ƀă dêi lâp tơnêi têa. Ăm Gia Lai chiâng môi tíu troh ki ro tung lơgât ôm hyô dêi lâp tơnêi têa ƀă kơpong. Má pái, cho mơjiâng ‘na logistics kơno tuk tro ƀă troăng prôk ƀă troăng kân tơdrăng Quy Nhơn – Pleiku, Bo cheăng Lâp plâi tơnêi Lệ Thanh, Kơno tuk lâp plâi tơnêi Quy Nhơn, mơjiâng logistics troăng pa kĭng peăng mâ hâi Lo mâ hâi Lâ vâ pro chiâng môi tung mâu tíu xiâm mơnhông dêi kong pơlê”.