Tiô tơbleăng, tung 8 khế apoăng hơnăm 2026, pêi lo liăn ngân tơnêi têa a Quảng Ngãi châ vâ chê 24 rơpâu rơtal liăn, tâk lối 10% tâng pơchông ƀă rôh kố hơnăm hdrối. Lâp kong pơlê hiăng mơ’no liăn cheăng châ 2.800 rơtal liăn, ƀă 35% pơkâ pêi hơnăm. Vâ lêi tah lôi mâu tơdroăng pá puât, tơvâ tơvân tung tơdroăng pêi pro pơkâ pêi mơnhông cheăng kâ – rêh ối pơlê pơla hneăng hơnăm 2026 – 2030, kong pơlê Quảng Ngãi pâ thế Khu xiâm pơkuâ liăn ngân pơtối tơmâng, pro tơ’lêi hlâu ‘na mâu tơdroăng xiâm ki tơdjâk Tơdroăng pơkâ mơjiâng Tíu xiâm chuâ, kơhleăng têa châu ƀă têa kơxăng tơnêi têa a kơpong cheăng kâ Dung Quất, mơnhông kơpong cheăng kâ Lý Sơn chiâng Tíu xiâm ôm hyô têa kơxĭ - rơlố tơnêi têa; pêi pro mơ-éa pêi pro tơdroăng tơkêa bro troăng kân ăm phêp rơxế kơtâu têi Quảng Ngãi – Kon Tum; mơdêk râ, po rơdâ troăng kân Tơnêi têa 24 tơdjêp pơla kong pơlê Quảng Ngãi (ton) ƀă kong pơlê Kon Tum (ton).

Tơdrêng amê, tơ’nôm kơxô̆ liăn mơngế pêi cheăng pêi pro mâu pơkâ ‘na khoa hok, kŏng ngê̆, pơhlêh nếo tơmiêt pêi rơkê ƀă pơhlêh xúa kŏng ngê̆, mơjiâng ivá tơdroăng mơdêk cheăng kâ - rêh ối pơlê pơla, djâ Quảng Ngãi chiâng tíu xiâm cheăng kâ têa kơxĭ ƀeăn ƀĕng dêi Tơnêi têa.