Khu séa ngăn klâ 2 tôh, troh lăm séa ngăn a 8 to cheăm, bêng mê cho: Xuân Lãnh, Sông Cầu, Phú Yên, Tuy An Nam, Krông Năng, Krông Pač, Ea Kar ƀă bêng Buôn Ma Thuột. A mâu cheăm, khu kăn kô tơmâng tối tơbleăng, tơpui ƀă kăn râ ủy, mâu kăn, măt trâ̆n, mâu kơvâ cheăng tơdjâk troh ‘na tơdroăng pêi pro mơnhông cheăng kâ- pơlê pơla, tơdroăng ‘mâi hơ’lêh pro hlá mơ-éa, pơ’lêh kơxô̆ mâu tơdroăng cheăng dêi khu kăn klêi tơ'mot tiô túa pêi cheăng péa râ.

Ki khât a mâu kong pơlê ăm hlo, pakĭng mâu tơdroăng pơ’lêh, túa pêi cheăng mâu kăn péa râ nếo trâm hên tơdroăng xơpá. Tơdroăng cheăng tâk rơdêi klêi tơ’mot tung pơla biên chế hâi châ xoăng teăm tơdrêng, hên kơvâ cheăng môi tiah kŏng ngê̆ thông tin, liăn ngân - Kê̆ toăn ôh tá ai hên kăn ƀô̆ ki rơkê, chiâng ai tơdroăng hên mơngế pêi cheăng.

Tơdrêng amê, xiâm tơmeăm, tíu pêi cheăng hâi ai tiô tơdroăng kal vâ, tơmeăm khoăng kŏng ngê̆ thông tin hâi tơniăn, tơdroăng pro hồ sơ ‘na tơnêi tíu ƀă mâu hlá mơ-éa pro tung kơmăi tiô troăng hyôh ối trâm hên xơpá tơvâ tơvân.. Khu kăn séa ngăn kô tơkŭm tơbleăng Vi ƀan pơkuâ cheăng Kuô̆k hô̆i vâ mâu tơdroăng pâ thế luât pơkâ tơleăng mơnhên teăm tơdrêng.