A mâu troăng kân Vĩnh Hảo - Phan Thiết; troăng kân 27, 28B, văng  Prenn…  hiăng hlo hên tíu mơni kô ai tơnêi tơnâp tơnêi, hmóu króu kô pro pá ‘na troăng prôk ƀă kô tơdjâk troh ki ôh tá tơniăn dêi kuăn mơngế, troăng prôk.

Tơdrêng amê  tơdroăng tơnêi tơhnâp, hâ ho troăng prôk xuân hiăng hlo hên a mâu troăng kân dêi kong pơlê tung mê ai troăng Đạo Nghiã - Quảng Khê; troăng DT715 tơkâ luâ cheăm Hàm Thuận... Mâu kăn mâu kong pơlê ƀă mâu khu râ kơvâ cheăng  tung kong pơlê Lâm Đồng hiăng mơhnhôk mâu ngế, rơxế  vâ tăng ngăn a mâu tíu tơnêi tơnâp rĕng ‘mâi rơnêu po troăng ăm têa hiu... chêh tơbleăng  tối mâu tíu ki rơ iêu vâ tơniăn ăm kuăn pơlê.

Hlo kong prâi ôh tá tơniăn, Vi ƀan kuăn pơlê dêi kong pơlê Lâm Đồng hiăng ai hlá mơ-éa hnê mơhno ăm  Khu pơkuâ ngăn lêng kong pơlê, Vi ƀan Kuăn pơlê mâu cheăm, bêng ƀă kơpong Phú Qúy hbrâ rơnáu ƀă kong mêi kân, têa lu, têa rơlêa, tơnêi tơhnâp.

Kong pơlê Lâm Đồng nôkố ai 8 to troăng kân ƀă tâi tâng ki xŏn vâ chê 1.400km ƀă vâ chê 1.300km  troăng tung kong pơlê. Xua hên troăng hâi châ ’no liăn mơjiâng pro  tơdâng  drêng ki prôk lăm tâk rơnâk ngo ki rơ iô kô tơ’lêi tro tơnêi tơhnâp, pro chôm, ôh tá tơniăn troăng prôk tung rơnó mêi khía.