A roh hôp, Khu tơkŭm po Tỉnh ủy Khánh Hòa hiăng tơbleăng pơkâ mơ’no mơngế, pơkâ rah xo pôa Trần Minh Thái, Kăn pơkuâ Đảng ŭy bêng Bảo An, veăng Khu pơkuâ, Khu hnê mơhno ƀă ro pro Kăn pơkuâ Đảng ủy cheăm Vĩnh Hải, hneăng hơnăm 2025 – 2030. Pôa Hồ Xuân Ninh, Kăn pơkuâ Khu pơkuâ Kơmăi kơmok tê mơdró, to pro Kăn pơkuâ hnê ngăn Đảng ủi cheăm Ninh Sơn. Pôa Trần Văn Thống, Phŏ Kăn pơkuâ Khu pêi cheăng Tỉnh ủy, to pro Kăn pơkuâ hnê ngăn Đảng ủy bêng Bảo An.

Xông tơpui a roh hôp, pôa Nghiêm Xuân Thành, Kăn pơkuâ hnê ngăn cheăng Tỉnh ủy Khánh Hòa, rơkâu mâu kăn ƀô̆ châ mơ’no rah xo, tơdrêng amê tối rơdêi kố cho mâu ngế hiăng châ rah xo inhên, tơtro ƀă pơkâ hnoăng cheăng. Pôa pơkâ thế mâu kăn ƀô̆ rĕng rup kŏng tung tơdroăng cheăng nếo, ƀă pêi pro Pơkâ Hneăng hôp Đảng ƀô̆ kong pơlê Khánh Hòa roh má I, hneăng hơnăm 2025 – 2030; mơnhông ivá, túa ki rơkê tơtro, pơhlêh nếo troăng pêi cheăng vâ kêi đeăng mâu hnoăng cheăng tung hơnăm 2025 ƀă mâu hơnăm pơtối nếo.