Kong pơlê Gia Lai hiăng pêi pro tâi tâng tơdroăng hbrâ ví kong mêi khía mơhot roh má 13 Kalmaegi a râ 5, râ ki têi má môi tung hbrâ ví kong prâi pro ôh tá tơniăn, ƀă 16 cheăm kĭng têa kơxĭ, ƀă râ 4 ƀă 42 cheăm ki ê nếo ối tung kơpong peăng mâ hâi Lo kong pơlê.

Tiô tối hdrối, vâ chê 12 chôu kơhâi dế kố (6/11), kong pơlê kô pêi kêi đeăng tơdroăng xĕn vâ chê 100.000 rơpŏng kuăn pơlê châ hdâ a tíu tơniăn, tơdâng 350.000 ngế, a mâu kơpong ki kong mêi khía mơhot plong mot ƀă achê kĭng têa kơxĭ, vâ tơniăn păng ‘nâng ahdrối kong mêi khía mơhot kân plong mot.

Khu pơkuâ hnê mơhno kong pơlê hiăng troh a An Nhơn, xua pôa Phạm Anh Tuấn, Kăn hnê ngăn Vi ƀan kong pơlê, Kăn pơkuâ Khu hnê mơhno hbrâ ví ngăn ‘na xivil kong pơlê – pro Kăn pơkuâ. Mâu ngế pêi cheăng tung Khu pơkuâ tơdroăng cheăng Đảng kong pơlê châ xing xoăng tơdrêng vâ pơkuâ, séa ngăn ƀă hnê mơhno tơdroăng hbrâ, ví xía vâ xua kong mêi khía mơhot pro a rêm kơpong môi tiah Quy Nhơn, Hoài Ân, Tây Sơn, Hoài Nhơn, Vĩnh Thạnh, Phù Mỹ ƀă mâu cheăm peăng mâ hâi Luô Gia Lai, tơniăn rêm khu châ lo pêi cheăng tiô troăng ‘’pŭn tơdrêng’’, hbrâ ví tơdrêng drêng ai kong mêi khía mơhot kân roh má 13 troh a tơnêi ‘lâng.

Tung lâp kong pơlê Dak Lak ai 2.555 toăng plong, tuk tung 10.994 ngế cheăng tơnăng ká xi xŏng, nôkố vâi hiăng vêh tot tơniăn a kĭng; krê kơpong bêng Xuân Đài pơkuâ rak ngăn 363 toăng plong tơnăng ká xi xŏng, troh a 16 chôu hâi lơ 5/11 tâi tâng plong tuk mê hiăng troh a kĭng. Cheăng rak vế tơnăng ká xĭ xŏng a têa kơxĭ ƀă túa ki hên xuân châ pêi pro, pơkâ thế a 536 toăng plong, tuk; tung 23.329 tíu ki păn xi xŏng kân ƀă 252 to tíu ki păn uâng lâ; khu ki pơkuâ ngăn cheăm bêng pơkâ thế pêi pro klêi mâu tơdroăng ki ‘mêng rơnêu ăm krá kâk hdrối 10 chôu kơxo lơ 6/11.

Rơtế amê, cheăng rak vế kế kâ têa ôu ƀă kế tơmeăm ki tŏng xo mâu ngế hliăng tiâ châ tơbleăng pêi pro tơdrêng. Khu ngăn cheăng kơmăi kơmok ƀă tê mơdró hiăng pêi pro klêi tơdroăng ki ‘măn kơdĭng kế tơmeăm, kế ki kal ƀă lối 400 tâ̆n phái, lối 10.350 kơthung têa, 72 rơpâu kơthung xup kơxŏng khăng ƀă lối 1 rơpâu kế ki ê, tơdrêng amê, hlối pơtroh mâu sinh viên, rơxế pơto chơ tơmeăm vâ gum drêng kal.

Pơkâ thế a Khu pơkuâ ngăn lêng a bêng, Kăn hnê ngăn Vi ƀan kong pơlê - pôa Tạ Anh Tuấn pơkâ thế mâu cheăm bêng hbrâ rơnáu mâu túa pơkâ pêi pro tŏng gum tơdrêng drêng trâm tơdroăng ki ôh tá tơniăn má môi, rak vế tơniăn khât ăm kuăn pơlê.

Nôkố, lâp kong pơlê Khánh Hoà ai vâ chê 7.000 roăng tuk tơnăng ká, tung mê dâng 900 tuk ƀă lối 5.700 ngế pêi cheăng dế tơnăng ká xi xŏng tung dế têa kơxĭ, hiăng châ tơbleăng ƀă kơbông krếo thế hdâ vêh hmuâ a tíu ối tơniăn. Tâi tâng lối 3.400 tíu păn ƀă lối 100.000 to hlâm ki păn ká xi xŏng tung têa xuân hiăng pơtê cheăng, mơngế pêi cheăng hiăng lăm a kĭng.

Mâu long têa păn ká ƀă long têa hngêi kơmăi on tơhrik châ séa ngăn tơniăn, mơ’no têa tơtro vâ mơdât tro têa lân lu, tơniăn ăm kơpong pá xôp. Tiô tơbleăng dêi kơ koan pơtâng tối ‘na hyôh kong prâi, sap hâi lơ 6 troh 8/11, Khánh Hòa kô ai mêi kân troh kân ó, khía pê têi 10 – 12, têa kơxĭ tơlâu xŏn a’ngêi 3 – 5 met. Ƀă tơdroăng ki hbrâ, kơtăng ƀă rŭm môi tuăn, kong pơlê dế mơjiâng ‘’kế tât’’ krá, tơniăn ôh tá ăm tro lŭp kế tơmeăm kô kơdroh iâ má môi ƀă tơniăn dêi rêm ngế kuăn pơlê đi đo pêi pro apoăng.