Kot mâ tung môi rơpŏng ki pêi chiâk, tíu ki ai hên kơdrâm kuăn pơlê hdroâng Khmer rêh ối, mê Huỳnh Thị Kẩm Huyên sap ing tơxĭn hiăng hlê nhên tơdroăng ki tơbrê tơbrêh dêi nôu pâ xuân môi tiah mâu kuăn pơlê a pơlê cheăm tơná. Xua tơdroăng ki mê hiăng hnan thế nâ tiô ƀối hriâm kơvâ ngăn pơkeăng, ƀă púi vâ djâ mâu tơdroăng ki rơkê plĕng ƀă kơpeăng kŏng dêi tơná vâ gum mâu ngế ki châi tamo kơtiê tơniăn tro má môi.

Ƀok thái pơkeăng Kẩm Huyên tối, sap ing tơxĭn nâ hiăng hlo tơdroăng ki tro châi tamo mê ôh tá châ pơlât tơniăn. Ai mâu ngế châi tamo ki ‘nâ bu ôh tá châ pơlât tơdrêng mê chiâng rế râ tâ mê nâ hiăng tơhrâ ƀă dêi tơná drêng kân hdrah ah athế pêi tơdroăng cheăng vâ gum rak ngăn ivá châ chăn tơniăn lĕm tâ, tung pơla nôu pâ môi tuăn khât ƀă tơdroăng pơkâ dêi tơná:

“Nôu pâ ôh tá pơklât thế tung tơdroăng ki hriâm lơ hriâm tơdroăng cheăng pêi ăm kuăn ‘nĕng ôh. Drêng ối xĭn nah á hmâ tro châi tamo, ƀă rêm rôh tamo mê hlo nôu pâ rak ngăn xơpá khât, mê á chiâng ai tơmiât xo ah hmôi pêi cheăng klâi vâ gum ngế ki ê châ rak ngăn ivá châ chăn tro tâ, nôu pâ châi tamo mê châ rak ngăn pơlât ăm tơniăn tâ. Mê á khŏm rah xo hriâm kơvâ ngăn pơkeăng”.

Hơnăm 2015, klêi kơ’nâi ai ƀâng Ƀok thái pơkeăng kân, Huỳnh Thị Kẩm Huyên châ xo mot pêi cheăng a Khoa Cấp cứu, Hngêi pơkeăng tơring Châu Thành (nôkố cho Tíu xiâm ngăn pơkeăng pơlât tơring Châu Thành). 10 hơnăm hdrối, ƀok thái pơkeăng Kẩm Huyên ôh tá kâi chôu vế tơná hiăng pơlât, tiâ mơnhên túa ki pơlât ăm to chât ngế. Hên ngế ki tro rong châ nâ ƀă vâi pú pơlât teăm tơdrêng hdrối vâ pơhlêh troh chuyên khoa ki tơtro.

Ôh ti xê kơhnâ krâu ƀă mâu ngế ki pơlât tơdrêng, ƀok thái pơkeăng Huyên ối mơ-eăm ƀă rak ngăn pơlât ăm mâu ngế ki châi tamo ki hiăng hên hơnăm. Tung mê ai ôh tá iâ mâu pôa krâ, jâ krâ drêng mot pơlât tung hngêi pơkeăng ai hiâm mơno tôu tuăn, thăm nếo tơpui hôu, tơpui têi kơ ƀok thái pơkeăng. La ƀă tơdroăng ki têm rơpiât ƀă kơhnâ krâu, Huyên hiăng pơhlêh mâu tơdroăng ki nhôm mê chiâng tơdroăng ki loi ƀă tơdroăng ki hâk mơnâ.

Pôa Nguyễn Văn Liêu, a cheăm Hưng Mỹ, tơring Châu Thành – môi ngế ki châi kóu kơxêng ƀă thoái hoă kơxêng rŏng, ing hên hơnăm kố hmâ mot lo tung hngêi pơkeăng ăm ‘nâi: Kố cho hngêi pơkeăng râ tơring mê gá achê tíu xiâm kong pơlê, ngế tro pơlât, khăm ki hên cho mâu ngế ki hiăng hên hơnăm ƀă rơpŏng kơtiê, cho mâu ngế ki ôh tá ai liăn ngân la ƀok thái pơkeăng ối kơhnâ krâu drêng pơlât ăm ‘nâi:

“Tối tơdjuôm mâu ƀok thái pơkeăng akố vâi kơhnâ krâu, pin châi ki klâi, krếo mê ƀok thái pơkeăng vâi kô ai mâ tơdrêng hlối. Ƀă ƀok thái pơkeăng Huyên xuân tiah mê, kơhnâ krâu khât, pin châi klâi mê khê̆n gá kô ai mâ tơdrêng hlối, ƀă kơhnâ krâu khât”.

Chôu vế rơkong hnê dêi Pôa Hồ ƀă mâu ƀok thái pơkeăng: “Ƀok thái pơkeăng athế têm rơpiât môi tiah ngế nôu”, ƀok thái pơkeăng Huỳnh Thị Kẩm Huyên hiăng ôh tá la lâi hriâm ƀối vâ pêi pro tro má môi hnoăng cheăng dêi tơná. Rak vế tro rơkong tơhrâ ƀă dêi tơná, nâ hiăng mơ-eăm hriâm tâp ƀă nôkố hiăng hriâm klêi Chuyên khoa 1 – Nội khoa.

Tơdroăng cheăng a hngêi pơkeăng gá xuân hiăng hên tơbrêi, la ƀă môi ngế ƀok thái pơkeăng kơdrâi môi tiah Huyên rế tơbrêi tâ. Mâu ngế ki lăm troh pơlât tơdrêng a kong măng, mâu ngế ki châi tamo drêng râ kal mơgât hiâm ki tôu ƀă tơmiât tro ƀă hên ki ê gá chiâng pro pá. La Huyên tá hâi la lâi ton tơrŏng. Malối, hngêi pơkeăng tơdah xo pơlât ki hên cho kuăn pơlê hdroâng Khmer, rơpŏng kơtiê châ kong pơlê gum ƀaoh hiêm khăm pơlât, ai tuăn mơno tá hâi hlê plĕng khât:

“Kuăn pơlê hdroâng kuăn ngo ngin ối a chê pơlê kân mê ối ‘nâi tơdroăng ki kố ki tá drêng troh khăm, la mâu ngế ki ối a thôn pơlê kơpong hngế hngo vâi xơpá khât. Ai mâu pôa krâ, jâ krâ troh hngêi pơkeăng mê ôh tá ai rơpŏng hngêi djâ lơ xua tơdroăng ki xơpá dêi rơpŏng hngêi ôh tá djâ lăm khăm, rak ngăn. Ai mâu ngế ki ‘nâ ôh tá ai liăn, mê ngin ối tơlo liăn roê ăm kơhôp hmê, kung kếo têa lơ mâu kế tơmeăm ki kal vâ xúa ăm vâi nếo”.

Ƀok thái CK1, Kăn pơkuâ Tíu xiâm khăm pơlât tơring Châu Thành tối: ƀok thái pơkeăng Kẩm Huyên cho ngế ƀok thái pơkeăng ki kơhnâ rơkê tâi hiâm mơno ƀă mâu ngế ki châi tamo hiâm mơno pôu râng dêi hnoăng ƀă rơkê tung tơdroăng cheăng dêi tơná, châ mâu vâi pú hâk mơnâ khât.

‘Na tơdroăng cheăng tung mâu rôh pêi cheăng khăm pơlât tối tơdjuôm ƀok thái pơkeăng Kẩm Huyên cho môi tung mâu ngế ƀok thái pơkeăng ki kơhnâ, rơkê dêi hngêi pơkeăng. Malối cho ‘na ivá cheăng; má péa cho ‘na túa ki tơdah xo xuân môi tiah túa ki tơpui ƀă mâu ngế ki châi tamo. Ki ê Kẩm Huyên xuân ai hiâm mơno hriâm ƀối ‘na tơdroăng cheăng, ƀă nôkố nâ hiăng hriâm klêi lâm kơ’nâi đăi hok”.

Tung pơla tơdroăng rêh ối xơpá ƀă tơbrêi tơbrêh môi tiah dế nôkố, la mâu tơdroăng ‘na hiâm mơno ki têm rơpiât, tâi ivá ƀă mâu ngế ki châi tamo kơtiê môi tiah ƀok thái pơkeăng Huỳnh Thị Kẩm Huyên cho athế châ tơtrŏng khât. Tơngah tiah kố, rế hía rế ai tơ’nôm hên ƀok thái pơkeăng hơnăm ối nếo tung hiâm mơno tơná ai plâi nuih kơhnâ, krâu vâ pêi cheăng pơlât, rak ngăn ivá, malối cho ƀă mâu ngế kơtiê rế hía rế tơniăn tro tâ. Ƀok thái pơkeăng Kẩm Huyên ôh ti xê to tơdroăng hâk tơngăm dêi rơpŏng hngêi, dêi hngêi pơkeăng, mê ối cho ngế ki djâ troăng ahdrối ăm mâu vâi pú hơnăm ối nếo tiô ƀối./.