A Hngêi pơkeăng cheăm Tu Mrông, tơring Tu Mrông, kong pơlê Kon Tum, ngế ki lâi oh tá mo ai tơdroăng châi kô troh akố vâ châ ƀok thái pơkeăng Y Hà khăm, pơlât. Nâ Y Hà tối, 26 hơnăm hmâ khăm a Hngêi pơkeăng cheăm Đăk Hà, klêi mê, Hngêi pơkeăng cheăm Tu Mrông, tơring Tu Mrông nâ hiăng hmâ hlo rêm ngế ki châi tamo, nâ cho mơngế Rơteăng kot mâ a kơpong kố, kuăn pơlê tŭm péa to cheăm xuân to kuăn pơlê mơngế Rơteăng mê nâ hlê rơkong tơpui, túa tơla tơpui kơ-êng drêng khăm pơlât hlâu tê.  

Tăng ‘nâi plĕng ing mâu kăn, kuăn pơlê ƀă mâu ngế pêi cheăng a hngêi pơkeăng châ ‘nâi, veăng ‘no hnoăng kân má môi dêi Ngế pơkuâ hngêi pơkeăng Y Hà luâ 26 hơnăm pêi cheăng akố hiăng djâ mâu ngế nôu ki vâ mơhum dêi kuăn troh mơhum a hngêi pơkeăng tah lôi túa tơlá mơhum kuăn a hngêi. Ƀă nâ Y Hà, phiu ro kân má môi cho châ hlo tơdroăng khăm rak ngăn ivá kuăn pơlê mơngế Rơteăng thăm rế krâu khât tâ:

“Hdrối nah tơdroăng châi tamo rơ-iô ‘nâng, hên há la troh akố tơdroăng khăm pơlât ivá kuăn pơlê hiăng troh tơrêm rơpŏng hngêi, troh pơlê. Pin akố ôh tá ai tơngê hmân, hiăng hlo kơdroh tơdroăng tơngê lo mơheăm, lo kơtuâ ‘mêi mâu pơreăng ki tâ tú. Tơdroăng cheăng hbrâ mơdât pơreăng hiăng kơdroh hên. Púi vâ tâi tâng kuăn pơlê rêh ối tung cheăm tơring mơ-eăm rak vế krúa lĕm ivá châ chăn tơná vâ kơdroh châi tamo” .

Tung pơla 26 hơnăm hmâ ƀă tơdroăng khăm pơlât a kơpong xơpá Tu Mrông, ƀă mơngế châi tamo cho mâu ngế Rơteăng, nâ Y Hà hiăng tơkâ luâ hên tơdroăng pá vâ mơ-eăm tiô hriâm ƀă chiâng ngế ki gum kuăn pơlê a tíu ki xơpá kô châ rak ngăn khăm pơlât ivá kuăn pơlê krâu khât tâ. Hlối pêi cheăng hlối hriâm, hơnăm 2017 nâ hiăng klêi hriâm Cử nhân điều dưỡng ngăn ‘na vâi kơdrâi mơhum kuăn. Ƀă hnoăng cheăng cho Ngế pơkuâ hngêi pơkeăng cheăm Tu Mrông, tơdrêng ƀă tơdroăng pơkuâ pêi hnoăng cheăng a hngêi pơkeăng, nâ Y Hà xuân kơhnâ lăm troh a 8 to thôn tung cheăm vâ tăng ‘nâi plĕng hôm ai ngế ki lâi tâ pơreăng châi tamo, trâm hnê kuăn pơlê thế rêh ối krúa lĕm rah vế ivá.

Tung pơla pêi hnoăng cheăng nâ rơtế ƀă ƀok thái pơkeăng, mâu ngế cheăng khăm pơlât dêi hngêi pơkeăng hiăng hên hdroh tŏng gum mơ’rêh ngế nôu ƀă o ngá.  Tơdroăng pêi cheăng tá tuăn ta mơno ƀă tơdroăng ngăn pơkeăng khăm pơlât a kơpong xơpá ƀă mâu ngế châi tamo pơlât mê cho mơngế Rơteăng, nâ Y Hà châ mâu vâi pú tối ‘nâi kơhnâ mơ-eăm khât ‘nâng. Nâ Phan Thị Thanh Vân, ngế cheăng ngăn pơlât mâu tamo a Hngêi pơkeăng cheăm Đăk Hà ăm ‘nâi:

“Nâ Y Hà cho môi ngế kơhnâ, ƀĕng tung tơdroăng cheăng. A hngêi pơkeăng rêm hâi nâ hnê mâu ngế pêi cheăng khăm pơlât pêi tơdroăng cheăng vâ pêi tro tiô hiăng pơcháu. Tung mâu tơdroăng cheăng pêi nâ veăng ƀă mâu ngoh nâ o lăm troh a mâu thôn pơlê vâ hnê kuăn pơlê rak ngăn krâu ivá tơná klêi mơhum kuăn ngá, klêi mê pâk pơkeăng mơdât pơreăng a tíu hmâ tơkŭm a thôn ôh tá xê a hngêi pơkeăng. Nâ tơmâng ngăn khât ‘na tơdroăng hnê mơhno vâi nâ o pêi cheăng tung hngêi pơkeăng a cheăm”.

Ƀok thái pơkeăng Nguyễn Thành Thảo, Phŏ pơkuâ Hngêi pơkeăng  tơring Tu Mrông tối:

“ Nâ Y Hà kơhnâ khât ‘nâng tung hnoăng cheăng rak ngăn khăm pơlât kuăn pơlê tung pơlê cheăm. Ƀă tuăn ngôa vâ khât pêi cheăng tá hiâm mơno, nâ Y Hà ‘nâi mơ-eăm cheăng tơƀrê tung kơvâ cheăng tơná kơhnâ hriâm tơ’nôm tơdroăng cheăng tơná. Nâ Y Hà cho môi ngế ki djâ troăng lĕm kơhnâ khât dêi hngêi pơkeăng’’.

Ai 26 hơnăm hmâ khât ƀă tơdroăng khăm pơlât ivá kuăn pơlê, nâ Y Hà, Ngế pơkuâ hngêi pơkeăng cheăm Tu Mrông, tơring Tu Mơrông, kong pơlê Kon Tum cho tíu tơngah krá kak ăm kuăn pơlê mơngế Rơteăng a tíu kố. Tơdroăng veăng pleăng, ing hnoăng cheăng pêi ƀă hiâm mơno vâ khât ƀă tơdroăng cheăng dêi nâ dế pơtối veăng pro pơ’lêh ki hlê plĕng, gum kuăn pơlê a kơpong tơnêi hên tơdroăng xơpá kố châ khăm pơlât krâu khât tâ. Ing mê, pin ai ngế ki mơ-eăm pêi cheăng tâi ivá, tá hiâm mơno ƀă kơhnâ khât dêi mâu kăn ƀô̆, mâu ngế cheăng ngăn pơkeăng pơlât dêi mâu kăn ƀô̆, mâu ngế pêi cheăng ngăn pơkeăng a kơpong hngế hngo.

Pakĭng mê, mơhno ki tơrŭm, môi tuăn dêi tâi tâng mâu ngế cheăng ngăn pơkeăng ƀă kuăn pơlê akố. Pin xiâm hlo ‘nâi ki hâk tơngăm dêi mơngế Rơteăng a pơlê cheăm kố drêng ai kăn ƀô̆ ngăn pơkeăng kơhnâ vâ khât tơdroăng cheăng môi tiah nâ Y Hà, veăng pro pơhlêh thăm rơkê plĕng, po rơdâ rế ai hên ngế kuăn pơlê châ khăm pơlât./.