Tung mâu hâi hdrối kô hía nah, a mâu kơpong peăng Hdroh tơnêi têa ƀă Tây Nguyên hiăng ai kong mêi kân tơnêi tơhnâp, têa lu  tơdjâk kân troh troăng prôk ƀă tơdroăng rêh ối dêi kuăn pơlê, malối a troăng kân 20 pơla troăng tơkâ luâ văng Bảo Lộc (kong pơlê Lâm Đồng), hiăng pro ăm tơnêi tơhnâp pro 3 ngế kăn sat gak troăng  prôk ƀă 1 ngế kuăn pơlê tro tơnêi kơđu.

Ngế pro xiâm hnê ngăn Chin phuh pơtroh rơkong hơlêm kơ mâu rơpŏng ki ai ngế hlâ. Ngế pro xiâm hnê ngăn Tơnêi têa pơkâ hnê mơhno tơdroăng ki kal dêi tơnêi têa ‘na hbrâ ví xía vâ kong prâi pro ôh tá tơniăn troh Vi ƀan tơnêi têa hbrâ ví xía vâ, tŏng xo mơngế hliăng tiâ, mâu Ngế xiâm, Kăn hnê ngăn Vi ƀan mâu kong pơlê hbrâ hnê mơhno, tơbleăng pơkâ pêi kơtăng, teăm tơdrêng, ai pơxúa khât tung tơdroăng hbrâ ví xía vâ, tơkâ luâ tơdroăng pá xua kong prâi pro ôh tá tơniăn ƀă tơmeăm khoăng kuăn pơlê.

Troh vâ chê 11h kơmăng lơ 30/7, khu cheăng kong pơlê Lâm Đồng hiăng tăng hlo châ dêi ngế trâm xía vâ ki u ối tung roh tơhnâp tơnêi a văng Bảo Lộc. Tiah mê, châ dêi 4 ngế tro kơđu tung roh tơhnâp a văng Bảo Lộc hiăng châ khu cheăng kong pơlê Lâm Đồng tăng hlo.

Xua kong mêi kân ton hâi hiăng pro tíu tơhnâp a văng Bảo Lộc ƀă drô troăng kân tơnêi têa kơxô̆ 20. A 14h30’, drêng pêi hnoăng cheăng séa ngăn, hnê prôk troăng ƀă rơnêu mâu tíu tơhnâp vâ tơniăn troăng prôk ăm mơngế prôk lăm, kơdrâ ai roh tơhnâp tơnêi râ ó pro 3 ngế kan sát rak tơniăn troăng klông ƀă môi ngế kuăn pơlê tro kơđu.

Klêi kơ’nâi ai roh tơdroăng kố, khu râ kăn pơkuâ kong pơlê Lâm Đồng hiăng ai mâ a tíu tơnêi tơhnah tơhnâp, hnê mơhno mâu kơvâ heăng mơhnhôk lối 300 ngế rơtế hên kơmăi kơmok pêi pro tơdroăng tŏng xo ƀă ti tăng tŏng kum mơngế trâm xía vâ.

Tung tơring Ea Súp ƀă tơring Lăk dêi kong pơlê Dak Lak, mâu hâi hiăng hluâ xuân ai kong mêi kân ton hâi pro lân lu hên ƀăng báu, prá alâi dêi kuăn pơlê ƀă hên troăng kân ôh tá chiâng vâ prôk lăm. Ki nhên a tơring Lăk, kong mêi têa kân lân lu hiăng lân lu 750 ha báu klâng dêi mâu rơpŏng kuăn pơlê a mâu cheăm Ƀuôn Tría, Buôn Triết, Dak Liêng ƀă mâu cheăm, pơlê kân.

Tung mê cheăm Ƀuôn Triết tro râ má môi ƀă lối 320 ha, cheăm Dak Liêng tro lân lu 268 ha, cheăm Ƀuôn Tría 106 ha, ki ê cho dêi mâu cheăm Yang Tao, Bông Krang ƀă pơlê kân Liên Sơn. Ki ê a tơring tơkăng kong Ea Súp, kong mêi kân ton hâi mâu hâi hdrối kô hía nah  xuân pro hên mâu troăng tung thôn, cheăm ƀă mâu cheăm Ea Lê, Ea Rốk, Ea Ƀung … tro têa lu, pro hên deăng pêt báu, prá alâi tro têa lu.

Mâu kăn ƀă kơvâ cheăng mâu cheăm tơring a kong pơlê Dak Lak hiăng pêi pro tơdroăng tơbleăng pêi mâu tơdroăng hbrâ ví xía vâ xua kong mêi têa lân lu.