VOV4.Xơ Đăng - Kơxê lơ 10/10, Ngế pro xiâm hnê ngăn Chin phuh nếo ai hlá mơ-éa pơtroh ăm kăn hnê ngăn Vi ƀan hnê ngăn kong pơlê, pơlê kong kân mâu kong pơlê Peăng Tơdế tơnêi têa; Mâu Khu xiâm kơvâ cheăng ki ai tơdjâk troh, mâu kơ koan thŏng tâ̆n chêh hlá tơbeăng Tơnêi têa, kong pơlê, Khu hnê mơhno cheăng tơnêi têa ‘na hbrâ ví khía mơhot têa kân lân lu ƀă Vi ƀan tơnêi têa hbrâ ví tơdroăng ki xía vâ, kong mê khía mơhot ƀă tí tăng tŏng xo mâu ngế hliăng tiâ ‘na hbrâ ví khía mơhot têa kân lân lu.

Tung hlá mơ-éa pơtroh mê tối nhên: Xua tơdjâk dêi hyôh hngíu, kơpong Peăng tơdế tơnêi têa mơni xuân pơtối ối ai kong mê kân tung la ngiâ, mơni kô ai têa lân lu a kơpong ki ai thông, tơhnah tơhnâp tơnêi, têa mơhiu a kơpong ngo chiâng pro pá ‘na troăng trôk, tơdjâk troh tơdroăng cheăng kâ, rêh ối dêi kuăn pơlê.

Kong mêi kân chiâng lân lu a Phú Yên

Ngế pro xiâm hnê ngăn Chin phuh pơkâ thế Vi ƀan hnê ngăn mâu kong pơlê, pơlê kong kân kơpong Peăng Tơdế tơnêi têa tơkŭm séa ngăn tơdroăng kong mê têa lân lu, séa ngăn ‘mâi xĕn kuăn pơlê lo ing mâu kơpong ki rơ-iêo, kơpong tro têa lu, têa hiu têi, pôi tá ăm ai mâu tơdroăng ki tơdjâk troh châ chăn kuăn mơngế; hnê tối, mơhnhôk, kuăn pơlê pêi pro mâu troăng hơlâ rak tơniăn, kơdroh ki tro tơ’nhiê kế tơmeăm drêng kong mê têa kân; hbrâ rơnáu rak tơniăn kế kâ ăm kuăn pơlê a mâu kơpong ki tro têa lân lu trâu, tơhnah tơhnâp tơnêi, hbrâ rơnáu tơkŭm tŏng kum ăm mâu rơpŏng kuăn pơlê ki mơni kô tro kơklêa.

VOV Tây Nguyên/Tơplôu: Katarina Nga